उरुळी कांचन : मागील दोन दिवसापूर्वी उरुळी कांचन भवरापूर या गावांदरम्यान असणाऱ्या पुलारून रस्ता ओलांडताना पुरात वाहून गेलेल्या प्रशांत डोंबाळेचा मृतदेह पिंपळगाव (ता. दौंड) येथे आज गुरुवारी (ता.२०) दुपारी १ वाजण्याच्या सुमारास आढळला आहे.
प्रशांत चांगदेव डोंबाळे (वय -३७, रा. दात्तार कॉलनी, उरुळी कांचन, ता. हवेली) असे मृत्यू झालेल्या तरुणाचे नाव आहे.
पोलिसांनी दिलेल्या माहितीनुसार, मागील तीन दिवसापासून उरुळी कांचनसह परिसरात मुसळधार पावसाने जोरदार हजेरी लावली आहे. मुसळधार पावसामुळे, नदी नाले व ओढ्यांना पूर आले आहेत. त्यातच उरुळी कांचन-भवरापूर या गावांदरम्यान असणाऱ्या पुलारून प्रशांत डोंबाळे हे त्यांच्या दुचाकीवरून मंगळवारी (ता. १८) रात्री नऊ वाजण्याच्या सुमारास चालले होते. तेव्हा डोंबाळे यांना तुटका महादेव मार्गावरील ओढ्यातील पुराचा अंदाज न आल्याने ते मोटारसायकलसहित पुलावरून खाली पडले. तर त्यांची दुचाकी पुलाच्या नळीमध्ये अडकली. मात्र ते पुरामध्ये वाहून गेले होते.
या घटनेची माहिती मिळताच, लोणी काळभोर पोलीस व उरुळी कांचन ग्रामपंचायत प्रशासन तातडीने घटनास्थळी दाखल झाले. जेसीबी मशीनच्या सहाय्याने घटनास्थळावरून दुचाकी बाहेर काढण्यात आली. मात्र प्रशांत डोंबाळे हे आढळून आले नाहीत. लोणी काळभोर पोलीस त्यांचा शोध घेत होते.
दरम्यान, पिंपळगाव (ता.दौंड) येथील काही नागरिकांना ओढ्यातून एक मृतदेह वाहून जात असल्याचे आढळून आले. नागरिकांनी याबाबत त्वरित यवत पोलिसांशी संपर्क साधून माहिती दिली. घटनेचे गांभीर्य लक्षात घेऊन यवत पोलीस ठाण्याचे वरिष्ठ पोलीस निरीक्षक नारायण पवार यांनी तातडीने घटनास्थळी पाठविले. पोलिसांनी ओढ्यातून सदर मृतदेह बाहेर काढला आहे. आणि तो मृतदेह प्रशांत डोंबाळे याचा असल्याचे निष्पन्न झाले आहे.
