लोणी काळभोर, (पुणे) : वडकी (ता. हवेली) ग्रामपंचायत हद्दीतील वडकीनाला परिसरातील हॉटेलच्या बाजूला गांजा विक्री करणाऱ्या एका आरोपीला लोणी काळभोर पोलिसांनी गांजासह ताब्यात घेतले. सोमवारी (ता. २६) रात्री एक वाजण्याच्या सुमारास ही घटना उघडकीस आली.
याप्रकरणी लोणी काळभोर पोलिसांनी सुभाष काशिनाथ गायकवाड (वय ६३, व्यवसाय वॉचमन सध्या रा. विजय हॉटेलचे बाजूला वडकी नाला, वडकी ता. हवेली जि. पुणे, मूळ-कुंभेफळ ता. परांडा जि. धाराशिव) याला अटक केली. त्याच्याकडून पोलिसांनी ४ हजार २०० रुपयांचा २१० ग्रॅम गांजा जप्त केला. याप्रकरणी पोलीस हवालदार अमित बाबासाहेब साळुंके यांनी लोणी काळभोर पोलीस ठाण्यात फिर्याद दिली.
लोणी काळभोर पोलिसांनी दिलेल्या माहितीनुसार, सोमवारी रात्री लोणी काळभोर पोलीस गस्त घालत असताना पोलीस हवालदार अमित साळुंके यांना विजय हॉटेलच्या बाजूला सुभाष गायकवाड हा बेकायदेशीररित्या गांजा विक्री करताना आढळून आला. त्याला ताब्यात घेऊन त्याची झडती घेतली असता त्याच्याकडून ४ हजार दोनशे रुपयांचा २१० ग्रॅम गांजा मिळून आला.
दरम्यान, याप्रकरणी पोलीस हवालदार साळुंके यांनी दिलेल्या तक्रारीनुसार गुन्हा दाखल करण्यात आला असून, आरोपीला अटक केली आहे. याप्रकरणाचा पुढील तपास लोणी काळभोर पोलीस करत आहेत.
