कोपरगाव : समृद्धी महामार्गावर भीषण अपघाताची मालिका सुरूच आहे. कोपरगाव तालुक्यातील धोत्रे शिवारात एक भीषण अपघात झाला आहे. या अपघातात कारमधील तिघांचा जागीच मृत्यू झाला आहे. तर दोन जण जखमी झाले आहेत. राहुल राजभोज, उमेश उगले, भाऊसाहेब पैठणे असे मृत व्यक्तींचे नावं आहेत. ही घटना रात्री ११ वाजण्याच्या सुमारास घडली. समृद्धी महामार्गावर एक कंटेनर नादुरुस्त असल्याने उभा होता. दरम्यान, शिर्डीकडे भरधाव जाणारी कार रस्त्यावर उभ्या असलेल्या कंटेनरचालकाला धडकल्यानंतर कंटेनरवर दूर जाऊन आदळली.
पोलिसांकडून मिळालेल्या अधिक माहितीनुसार, समृद्धी महामार्गावर रात्री ११ च्या सुमारास कारचा अपघात झाल्याची घटना घडली आहे. कोपरगाव तालुक्यातील धोत्रे शिवारात हा अपघात झाला आहे. यामध्ये तिघांचा मृत्यू झाला असून, दोघे जण जखमी झाले आहेत. घटनेची माहिती मिळताच महामार्ग पोलिसांसह नागरिकांनी घटनास्थळी धाव घेत जखमींना वैजापूर येथे उपचारासाठी दाखल करण्यात आलं आहे.
अपघातात MH 21 BF 9248 या क्रमांकाच्या कारमधील तिघांचा जागीच मृत्यू झाला. मृत राहुल राजभोज, उमेश उगले, भाऊसाहेब पैठणे हे जालना जिल्ह्यातील जाफराबाद येथील रहिवासी आहेत. ते सर्व शिर्डीकडे निघाले होते. अपघातात फलके आणि वाघ हे जखमी झाले असून त्यांना उपचारासाठी छत्रपती संभाजीनगर येथे दाखल करण्यात आले आहे. तर, तिघांचे मृतदेह कोपरगाव ग्रामीण रुग्णालयात शवविच्छेदनासाठी पाठविले आहे. याबाबत गुन्हा दाखल करण्याची प्रक्रिया रात्री उशिरापर्यंत सुरू होती.
