Nagpur Accident : नागपूर : नागपूरच्या वाठोडा पोलीस ठाण्यांच्या हद्दीत एका टिप्परने दोघांना चिरडले. या घटनेमध्ये सख्या बहिण-भावाचा जागीच मृत्यू झाला आहे. या घटनेनंतर संतप्त जमावाने टिप्पर पेटवला. कचरा उचलणारा टिप्पर होता. अंजली ननेलाल सैनी (वय 20) आणि सुमित ननेलाल सैनी (वय 16) असे या दोघा मृतांचे नाव आहे.
सकाळी दहा- साडे दहाच्या सुमारास अंजली सैनी आणि तिचा लहान भाऊ सुमित सैनी हे आपल्या दुचाकीने कामावर जात होते. सुमित हा गॅरेजमध्ये काम करत होता तर अंजली एका कॅफेत काम करत होती. दरम्यान रस्त्याने भरधाव येणाऱ्या टिप्परणे यांच्या वाहनाला धडक दिली. ही धडक इतकी भीषण होती की या टिप्परने या दोघांसह मोटर सायकलला काही अंतर फरफटत नेले. ज्यामध्ये या दोघांचा जागीच मृत्यू झाला.
या घटनेनंतर नागरिकांनी टिप्परला आग लावली. वाठोडा पोलिसांचा ताफा घटनास्थळी पोहचला. अग्नीशमन दलाने आग विझवली. संतप्त नागरिकांनी अग्नीशमन दलावरही रोष व्यक्त केला. सध्या पोलिसांनी पंचनामा करून दोन्ही मृतदेह शवविच्छेदनासाठी रवाना केले आहेत.
