पुणे : कार्यालयीन वेळेत मोबाईलच्या अतिवापरामुळे कामकाजावर परिणाम होत असल्याने कंत्राटी मनुष्यबळाने निर्धारित कार्यालयीन वेळेत मोबाईल वापरू नये, असे आदेश पुणे महानगर प्रदेश विकास प्राधिकरणामध्ये (पीएमआरडीए) लागू करण्यात आला आहे. बाह्यस्रोत यंत्रणेमार्फत घेतलेल्या कंत्राटी मनुष्यबळाने संबंधित आदेश लागू आहे. त्याची अंमलबजावणी कंत्राटी एजन्सीने सुरू केली आहे.
पीएमआरडीएच्या कार्यालयात ४०७ पदांचा आकृतिबंध मंजूर झालेला आहे. या मंजूर आकृतिबंधातील प्रतिनियुक्तीसह आस्थापनेवरील मोठ्या प्रमाणात पदे रिक्त आहेत. प्रतिनियुक्तीची पदे शासनाकडून उपलब्ध होईपर्यंत, तसेच सरळसेवेच्या पदांची बिंदुनामावली मंजूर होऊन ही पदे एमपीएससी व जिल्हा निवड समितीमार्फत भरती करण्यास काही कालावधी अपेक्षित आहे. संबंधित पद भरती होईपर्यंत पीएमआरडीएने बाह्यस्रोत एजन्सी नियुक्त करून त्यांच्यामार्फत कंत्राटी मनुष्यबळ नियुक्त केले आहे.
बाह्यस्रोत एजन्सीमार्फत पीएमआरडीएमध्ये कार्यरत मनुष्यबळाकडून कार्यालयीन वेळेत मोबाईलचा वापर होत असल्याने कामकाजात अडचणी निर्माण होत आहेत. गोपनीयतेचा भंग होऊ नये व कार्यालयीन शिस्तीचा भाग म्हणून कार्यालयीन वेळेत संबंधित कंत्राटी मनुष्यबळाने कार्यालयीन वेळेत मोबाईलचा वापराला बंदी घातली असून, कंत्राटी एजन्सीकडून त्यांची अंमलबजावणी सुरू झाली आहे. या निर्णयामुळे संबंधित कर्मचारी पूर्णवेळ कामकाजात व्यस्त राहणार असल्याने कार्यालयीन कामकाजात अधिक सुरळीतपणा येण्यास मदत होईल.
