पुणे : रागाने पाहतो म्हणून हटकल्याच्या कारणाने तरुणावर दारुच्या बाटलीच्या साह्याने वार करुन गंभीर जखमी केल्याची धक्कादायक घटना आकुर्डी येथे घडली. याप्रकरणी एका व्यक्तीवर गुन्हा दाखल करुन अटक केली आहे. आकुर्डी येथील पुष्कर वाईन्स समोरील मोकळ्या जागेतील पार्किंगमध्ये ही घटना रविवारी (ता. २६) सायंकाळी पाच वाजण्याच्या सुमारास घडली.
याबाबत शंकर बाबा पांडवे (वय-२४, रा. पांढरकर वस्ती, आकुर्डी) यांनी निगडी पोलीस ठाण्यात फिर्याद दिली आहे. यावरुन घनश्याम माणिक शिवरकर (वय-४९, रा. वाघदरा, ता. खापरी मोरेश्वर, जि. नागपूर, सध्या रा. पुणे) याच्यावर गुन्हा दाखल करुन अटक करण्यात आली आहे.
याबाबत पोलिसांनी दिलेल्या माहितीनुसार, फिर्यादी शंकर व त्याचे मित्र पार्किंगमध्ये मद्य पित होते. त्यावेळी आरोपी त्यांच्याकडे रागाने पाहत होता. शंकर याने आरोपीला ‘रागाने का पहातो’ अशी विचारणा केली. यावर आरोपी संतप्त झाला.
त्याने दारुची बाटली हातात घेऊन शिवीगाळ सुरू केली. शंकर याच्या डोक्यावर, मानेवर, छातीवर दारूच्या बाटलीने सपासप वार केले. या मारहाणीमध्ये शंकर पांडवे गंभीर जखमी झाला. या घटनेचा पुढील तपास पोलीस उपनिरीक्षक विकास शेळके करीत आहेत.
