यवत: पुणे- सोलापूर राष्ट्रीय महामार्ग व सातारा-शिरूर राज्यमार्ग हे एकत्र येत असलेल्या केडगाव चौफुला येथील मुख्य चौकातील बंद असलेला हायमास्ट दिवा सुरु करण्याची मागणी नागरिक करत आहेत. चौफुला येथे कायमच मोठ्या प्रमाणात वाहनांची व नागरिकांची वर्दळ असते. चौफुला मुख्य चौकात असलेला हायमास्ट दिवा काही दिवसांपासून बंद आहे. हा बंद असलेला हायमास्ट दिवा दुरुस्ती करून सुरू करण्यात यावा, अशी मागणी प्रवासी व नागरिक करत आहेत.
या बंद असलेल्या हायमास्ट दिव्यामुळे चौकात सर्वत्र अंधार पसरतो, तसेच यामुळे लहान-मोठे अपघात होण्याची शक्यता नाकारता येत नाही. रात्री अनेक प्रवासी या मार्गावरून ये-जा करत असल्याने हा हायमास्ट दिवा सुरु करणे आवश्यक आहे. या बंद दिव्यामुळे नागरिकांना मनस्ताप होत आहेत. रात्रीच्या वेळी छोटे-मोठे व्यावसायिकांना देखील काही समस्यांना तोंड द्यावे लागत आहे. अनेक प्रवाशी प्रवास करण्यासाठी या चौकात रात्री उभे असतात. त्यांच्या सुरक्षिततेसाठी प्रशासनाने लवकरात लवकर बंद असलेले हायमास्ट दिवे चालू, करावेत अशी मागणी स्थानिक नागरिक करीत आहेत
