पुणे : ससून रूग्णालयातून फरार झालेला ड्रग्ज तस्कर ललित पाटील सध्या पुणे पोलिसांच्या ताब्यात आहे. त्याची पोलीस कोठडी २० नोव्हेंबर रोजी संपली. या दरम्यान केलेल्या चौकशीत धक्कादायक माहिती उघड होत आहे. अमली पदार्थ तस्कार प्रकरणात आणखी चार नावे उघड झाली आहेत.
त्यातील दोन आरोपी इम्रान शेख उर्फ अतिक अमीन खान आणि रहिश्चंद्र पंत यांना पोलिसांनी अटक केली. या दोघांसह अकरा जणांवर मकोकानुसार कारवाई करण्यात आली आहे. या प्रकरणातील आरोपींचे आंतरराष्ट्रीय कनेक्शन असण्याची शक्यता पोलिसांनी न्यायालयात व्यक्त केली.
ललित पाटील याची पोलीस कोठडी २० नोव्हेंबर रोजी संपली होती. त्यानंतर त्याला पुन्हा न्यायालयात हजर करण्यात आले. त्यावेळी पोलीस तपासातील महत्वाची माहिती न्यायालयात सादर करण्यात आली. यासंदर्भात गोपनीय अहवाल न्यायालयात सादर करण्यात आला. त्यामध्ये ललित पाटील याचे आंतरराष्ट्रीय कनेक्शन असण्याची शक्यता व्यक्त केली आहे.
मेफेड्रोन ड्रग्सची निर्मिती, ड्रग्सची साठवण, ड्रग्सचे वितरण ही माहिती तपासात उघड झाली आहे. त्यात प्रत्येकाचा सहभाग स्पष्ट झाला आहे. यानंतर ललित पाटील, अरविंद लोहरे, भूषण पाटील, जिशान शेख, राहुल पंडित, इम्रान शेख, शिवाजी शिंदे, हरिश पंत यांची पोलीस कोठडी २४ नोव्हेंबरपर्यंत वाढवण्याचे आदेश न्यायालयाने दिले. बचाव पक्षातर्फे आरोपींना पोलीस कोठडीची गरज नसल्याचा युक्तीवाद करण्यात आला.
दरम्यान, ललित पाटील प्रकरणात नाथ काळे आणि अमित जाधव या दोघांना पोलीस खात्यातून बडतर्फ केले आहे. पोलीस आयुक्त अरविंद चावरिया यांनी सोमवारी बडतर्फीचे आदेश काढले. नाथाराम काळे आणि अमित जाधव यांची कोर्ट कंपनी म्हणून ससून रुग्णालयात नेमणूक करण्यात आली होती.
