Maharashtra weather update : पुणे : राज्यात आता कडक्याची थंडी सुरु होणार आहे. सध्या मध्य महाराष्ट्र, पश्चिम महाराष्ट्रासह राज्यातील इतर भागात गारवा वाढला आहे. पुणे, मुंबई शहरातील तापमान घसरले आहे. येत्या तीन दिवसांत थंडी अधिक वाढणार असल्याचा अंदाज हवामान विभागाने व्यक्त केला आहे.
दोन ते तीन अंश सेल्सिअस तापमान घटणार
राज्यात सध्या कोरडे वातावरण असून पुढील तीन दिवस तापमान आणखी कमी होणार आहे. राज्यातील बहुतेक भागांत किमान तापमानात सरासरी दोन ते तीन अंश सेल्सिअसने घट होणार आहे. असा अंदाज हवामान विभागाने व्यक्त केला आहे. हवामान विभागाने दिलेल्या माहितीनुसार, राज्यावर सध्या कोणतीही हवामानविषयक परिस्थिती सक्रीय नाही.
नंदुरबार जिल्ह्यात तापमान घटले
दिवाळीनंतर नंदुरबार जिल्ह्यात तापमानात घटले आहे. जिल्ह्यात सपाटी भागात तापमान १९ अंश सेल्सिअसपर्यंत खाली आले आहे. सातपुड्याचा दुर्गम भागात हे तापमान १५°c पर्यंत असल्याने जिल्ह्यात सकाळी कडाक्याची थंडी जाणवू लागली आहे. येत्या काही दिवसांत तापमान अजून घसरणार असल्याची शक्यता हवामान खात्याने व्यक्त केली आहे.
विदर्भात गारठा वाढणार
विदर्भ आणि उत्तर महाराष्ट्रात गारठा जाणवणार आहे. राज्यात रविवारी सर्वांत कमी तापमान गोंदियात नोंदवण्यात आले. गोंदियात १५.५ अंश सेल्सिअस कमाल तापमानाची नोंद झाली आहे. पुणे शहरातील तापमान १६.९ अंश सेल्सियस होते. मुंबईत २४ अंश सेल्सिअस तापमान होते. दक्षिण आणि मध्य महाराष्ट्रात ढगाळ वातावरण निर्माण होण्याचा अंदाज आहे. अनेक ठिकाणी पहाटे धुके पडण्याचा अंदाज आहे.
अंडी महगण्याची शक्यता
मुंबईत थंडीच्या दिवसांत अंडी महगण्याची शक्यता आहे. ५ रुपयाचे अंडे ७ रुपयांवर जाण्याची शक्यता आहे. कुक्कुटपालनाचा खर्च वाढल्यामुळे प्रती अंडे २ रुपये वाढण्याची शक्यता आहे. अंड्याचे दर वाढल्यास सर्वसामान्यांना त्याचा फटका बसण्याची शक्यता आहे.
