Pune Crime: पुणे : घरातील किरकोळ कारणावरून झालेल्या वादातून जन्मदात्या आईला पोटच्या मुलाने डोक्यात लाकडी वासा मारुन खून केल्याची खळबळजनक घटना मामुर्डी गावात घडली. याप्रकरणी देहूरोड पोलीस ठाण्यात मुलावर खुनाचा गुन्हा दाखल करुन, अटक करण्यात आली आहे.
याबाबत मिळालेल्या माहितीनुसार, ही घटना १४ नोव्हेंबर रोजी मामुर्डी गावातील अगरवाल चाळीत रात्री साडेआठ ते दहाच्या सुमारास घडली. कांताबाई अश्रुबा शिंदे (वय-६०, रा. मामुर्डी गाव) असे खून झालेल्या महिलेचे नाव आहे. याबाबत पोलीस शिपाई मोमीन सुलेमान शेख (वय २७) यांनी देहूरोड पोलीस ठाण्यात फिर्याद दिली आहे. पोलिसांनी निळकंठ अश्रुबा शिंदे (वय-४१, रा. अगरवाल चाळ, मामुर्डी गाव) याच्यावर गुन्हा दाखल करुन अटक केली आहे.
पोलिसांनी दिलेल्या माहितीनुसार, आई आणि मुलामध्ये घरगुती कारणावरून वाद होत होते. याच कारणावरुन मंगळवारी (ता. १४) रात्री साडेआठच्या सुमारास आरोपीने आई कांताबाई शिंदे यांच्यासोबत हुज्जत घालण्यास सुरवात केली. रागाच्या भरात त्याने आईच्या डोक्यात लाकडी वासा मारून मारहाण केली. या मारहाणीमध्ये गंभीर जखमी झाल्याने कांताबाई यांचा मृत्यू झाला. घटनेची माहिती मिळताच पोलिसांनी घटनास्थळी धाव घेतली. पोलिसांनी घटनास्थळाचा पंचनामा करुन, आरोपी मुलाला अटक केली आहे. पुढील तपास सहायक पोलीस निरीक्षक जाधव करीत आहेत.
