पुणे : ‘आम्ही इथले भाई. मध्ये कोण आला तर कापून टाकीन, आमचा नाद करायचा नाही’ असे जोरात ओरडत धारदार हत्याराचा धाक दाखवून रिक्षाची काच फोडली आणि जबरदस्तीने खिशातील पैसे लुटून फरार झालेल्या एका सराईत गुन्हेगाराला खडकी पोलिसांनी अटक केली आहे. त्याच्या दोन साथीदारांवर गुन्हा दाखल केला आहे. जुना पुणे-मुंबई महामार्गावरील बोपोडी येथील कुंदन प्लाझा येथे रविवारी (ता. १२) रात्री साडेअकराच्या सुमारास ही घटना घडली. याप्रकरणी आकाश शिवबाबू पांडे (वय-२६, रा. गल्ली क्र. १०, पाटील इस्टेट, शिवाजीनगर) यांनी खडकी पोलीस ठाण्यात फिर्याद दिली आहे.
याप्रकरणी मिळालेल्या अधिक माहितीनुसार, गौरव विनोद मोरे (वय-१९, रा. भालेराव नगर, पिंपळे गुरव) असे अटक केलेल्या आरोपीचे नाव आहे. तर दोन साथीदारांवर महाराष्ट्र पोलीस कायद्यांतर्गत गुन्हा दाखल केला आहे. आरोपी रेकॉर्डवरील गुन्हेगार आहेत. पोलिसांनी दिलेल्या माहितीनुसार, फिर्याद आकाश पांडे हे त्यांच्या रिक्षातून कुटुंबासह भिमाशंकर येथील देवदर्शन करुन घरी येत होते.
त्यावेळी आरोपी गौरव मोरे याने रिक्षाची काच दगड मारुन फोडली. धारदार हत्यारे घेऊन दोन साथीदारांसह रिक्षाजवळ आला. फिर्यादी आकाश याला पकडून शस्त्राचा धाक दाखवून जीवे मारण्याची धमकी दिली. खिशातील पाकीट जबदस्तीने काढून त्यातील ३२०० रुपये चोरले. दरम्यान, जबरदस्तीने पैसे चोरून नेत असताना त्याठिकाणी लोकांनी गर्दी केली. त्यावेळी आरोपींनी हवेत धारदार हत्यारे फिरवली. ओरडून परिसरात दहशत निर्माण केली.
