मुंबई: काँग्रेस नेते आणि माजी कॅबिनेट मंत्री आमदार अस्लम शेख यांना जीवे मारण्याची धमकी मिळाली आहे. धमकीचा फोन करणाऱ्या व्यक्तीने स्वतःची ओळख गँगस्टर गोल्डी ब्रार म्हणून केली आहे. दरम्यान, या प्रकरणी मुंबईच्या मालाडमधील बांगूर नगर पोलिसांनी गुन्हा दाखल केला आहे. एएनआयने यासंदर्भातील वृत्त दिलं आहे. गोल्डी ब्रार हा तुरुंगात बंद गँगस्टर लॉरेन्स बिश्नोईचा जवळचा सहकारी आहे. त्यानं यापूर्वी बॉलिवूड स्टार सलमान खानलाही जीवे मारण्याची धमकी दिली होती.
आमदार अस्लम शेख यांचे स्वीय सहाय्यक आणि वकील विक्रम कपूर यांनी याप्रकरणी पोलिसात तक्रार दिली आहे. विक्रम कपूरच अस्लम शेख यांना आलेले सर्व फोन उचलतात. अस्लम शेख यांना ५ ऑक्टोबर रोजी हा फोन आला असल्याची माहिती कपूर यांनी दाखल केलेल्या तक्रारीत दिली आहे. फोन करणार्‍याने स्वत:ची ओळख गोल्डी ब्रार अशी करून दिली. “मी गोल्डी ब्रार बोलत आहेत. मी अस्लम शेखला दोन दिवसांत गोळ्या घालून मारणार आहे. हे अस्लम शेखला सांगा”, असा फोन विक्रम कपूर यांना आला होता. हा फोन येताच विक्रम कपूर यांनी तत्काळ पोलिसांत धाव घेऊन तक्रार दाखल केली. फोनचे तपशील देखील त्यांनी पोलिसांना दिले आहेत. विक्रम कपूर यांनी दिलेल्या मोबाईल क्रमांकावरून पोलिसांनी भारतीय दंड संहितेच्या कलम ५०६(२) आणि ५०७ अंतर्गत गुन्हा दाखल केला आहे. तसेच पुढील तपासही पोलिसांनी सुरू केला आहे.
हेही वाचा:
IND vs AUS: डेव्हिड वॉर्नरने मोडला सचिन तेंडुलकरचा विक्रम, भारताविरुद्ध केली मोठी कामगिरी
अखेर इस्रायलमध्ये अडकलेल्या नुसरत भरुचाशी झाला संपर्क, अडचणीनंतर अभिनेत्री सुरक्षितपणे परतणार भारतात
