Shirur News : टाकळी हाजी : वाशिम जिल्ह्यातील एक महिला पुणे- नगर जिल्ह्याच्या सीमेवरील कुंड पर्यटन स्थळावरील रांजण खळगे पाहत असताना, पाण्यात पाय घसरून मंगळवारी ( ता.८) सायंकाळी पावणे पाचच्या सुमारास घडली आहे. रात्री उशिरापर्यंत तिचा शोध सुरू होता मात्र तपास लागला नाही.
कुंड पर्यटन स्थळ पुणे येथील घटना
पद्माबाई शेषराव काकडे (वय-५५, रा.मोहगव्हाण ता. कारंजा, जि. वाशिम) असे रांजणखळग्यात वाहून गेलेल्या महिलेचे नाव आहे.
मिळालेल्या माहितीनुसार, पद्माबाई काकडे या नातेवाईकांसोबत रांजण खळगे कुंड येथे आल्या होत्या. दरम्यान, काकडे या रांजण खळगे पाहत असताना त्यांचा पाय घसरल्याने पाण्याच्या प्रवाहात वाहून गेल्या. मात्र तेथील खडकामध्ये रांजणाच्या आकाराचे मोठे मोठे खड्डे असल्याने ती कदाचित त्यामध्ये अडकली असावी असा प्रत्यक्ष दर्शींचा अंदाज आहे.
महीला पाण्यात पडल्याचे पाहताच तिला वाचविण्यासाठी तिचे जावई महेंद्र शहादेव औताडे यांनी पाण्यात उडी घेतली. काही अंतरापर्यंत त्यांनी महिलेला पकडले मात्र नंतर पाण्याच्या वेगामुळे खाली खोलातील खड्ड्यात महिला गेल्याने तिची साडी औताडे यांच्या हातात राहिली.
महिलेच्या सोबत असलेल्या नातेवाईकांनी आरडा ओरडा केल्यामुळे स्थानिकांनी तिकडे धाव घेतली व महेंद्र औताडे यांना पाण्यातून बाहेर ओढले. औताडे यांना या रांजण खळगे परिसराचा अंदाज न आल्याने त्यांनी पाण्यात उडी मारली असावी. त्यांना दुखापत झाली असून त्यांचाही जीव थोडक्यात बचावला आहे. असे तेथील प्रत्यक्षदर्शी बापू होणे यांनी सांगितले.
दरम्यान, कुंड पर्यटन स्थळ पुणे जिल्ह्यातील टाकळी हाजी आणि नगर जिल्ह्यातील निघोज या गावांच्या सीमेवर असून निघोज बाजूकडून टाकळी हाजी हद्दीकडे येत असताना निघोज हद्दीत हा प्रकार घडला आहे. वाहत्या पाण्यामुळे शोध घेणे अवघड झाल्याने पाण्याचा प्रवाह बंद करण्यासाठी पाटबंधारे विभागाच्या अधिकाऱ्यांना पोलिसांनी संपर्क साधला असून सर्वजण पाणी बंद होण्याची वाट पाहत आहेत.
