पुणे : नाशिक जिल्ह्यातील पळसे गावात नुकत्याच ‘बाराशे’ नावाचा श्‍वानाचे निधन झाल्याने त्याच्या अंत्यसंस्कारासाठी चक्क गाव गोळा झाले होते. अंत्यविधीला गावात मोठा जनसागर लोटला होता. या ठिकाणी शोकसभा झाली आणि शोकसभेमध्ये या श्वानाच्या स्मारक बांधण्याबाबत ग्रामस्थांनी एकमताने ठरावही मंजूर केला.
आजच्या धावत्या आणि आधुनिक तंत्रज्ञानाच्या युगात माणूस माणसांपासून लांब जात असल्याचे चित्र आपण पाहतो ; परंतु जीवापाड प्रेम करून बाळगलेले प्राणी त्याच ताकदीने पालकाला लळा लावतात, हेसुद्धा याच युगात घडत आहे. प्राण्यांवर विशेष म्हणजे श्वानांवरप्रेम करणारे अनेक जण आपल्याला पाहायला मिळतात. जितका माणूस प्रणयाला जीव लावतो तितकाच श्वानही माणसाला जीव लावत असतो.
पळसे गावात कोणाचाही अंत्यविधी असो, रक्षा विसर्जन, दशक्रिया विधी असो तो गावातील भावकीतला असल्याप्रमाणे प्रत्येक विधीकरिता माणसांसोबत चालत दारणातीरी हजर असायचा. त्याची उपस्थिती ही कायमच चर्चेचा विषय असायचा. परंतु त्याचा शुक्रवारी अंत्यविधी झाला. या वेळी ग्रामस्थांनी मोठी गर्दी केली होती.
गावातील हरिनाम सप्ताहातील कार्यक्रमास, इतर सुख दुःखाच्या प्रसंगी कोणाच्याही दारी तो हक्काने दिसत असे. त्याला कोणाच्याही घरी मुक्‍त प्रवेश असे. तरुण पिढी त्याला आवर्जून बिस्किटे देत, तर एखादी आजी त्याला आठवणीने चतकोर भाकरी काढून ठेवायची. शुक्रवारी पहाटे त्याचे निधन झाल्याने समस्त पळसेकरांनी हळहळ व्यक्त केली. गावाच्या वेशीपासून त्याची मिरवणूक काढून रीतीरिवाजाप्रमाणे त्याचा अंत्यविधी केला.
दरम्यान, साहित्यिक उत्तम कांबळे, तसेच पुणे, ठाणे, नाशिक, नागपूर अशा अनेक ठिकाणांहून नागरिक खास या माणूसवेड्या बाराशे नामक श्‍वानाला बघायला येऊन गेलेले आहेत.‘बाराशे’चे पुढील पिढीकरिता गावात उचित स्मारक करण्याचा निर्णय शोकसभेत विष्णुपंत गायखे यांनी ग्रामस्थांच्या सूचनेनुसार घेतला आहे.
