जुन्नर, (पुणे) : दशक्रिया विधीवरून घरी परतत असताना डंपरने सायकलला दिलेल्या धडकेत एका व्यक्तीचा मृत्यू झाल्याची घटना राजुरी (ता. जुन्नर) येथे घडली. या घटनेने गावावर शोककळा पसरली असून डंपर चालकाविरोधात पोलीस ठाण्यात गुन्हा दाखल करण्यात आला आहे.
लक्ष्मण शिवराम हाडवळे (वय ७५, रा. उंचखडक, राजुरी) असे अपघातात मृत्यू झालेल्या व्यक्तीचे नाव आहे. याप्रकरणी महेश ज्ञानदेव कणसे यांनी डंपर चालकाविरुद्ध आळेफाटा पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, लक्ष्मण हाडवळे हे उंचखडक येथून राजुरी गावात दशक्रिया विधीसाठी शुक्रवारी सकाळच्या सुमारास गेले होते. दशक्रिया विधी उरकल्यानंतर हाडवळे हे सायकलवरून उंचखडक येथे परतत असताना सकाळी साडेनऊच्या सुमारास राजुरी-उंचखडक रोडवर असणाऱ्या कॅनॉलजवळ त्यांच्या सायकलला डंपरने जोराची धडक दिली.
दरम्यान, सायकलला धडक बसल्याने त्यांचा तोल गेला आणि ते डंपरच्या चाकाखाली आले. डंपरचे चाक अंगावरून गेल्यामुळे लक्ष्मण हाडवळे यांचा जागीच मृत्यू झाला. अचानक घडलेल्या या घटनेमुळे उंच खडक परिसरात चालकाविरोधात रोष निर्माण झाला होता. घटनेची माहिती मिळताच पोलिसांनी घटनास्थळी धाव घेतली. डंपर चालकाच्या विरोधात गुन्हा दाखल करण्यात आला असून या प्रकरणाचा पुढील तपास पोलीस करत आहेत.
