पुणे : पैसा हा सर्वस्वी असल्याचे पुन्हा एकदा समोर आले असून पैशाच्या पुढे कोणीही नाही असे सिद्ध झाले आहे. पैशाच्या वादातून जिवलग मित्राच्या डोक्यात रॅाड मारून खून केल्याची धक्कादायक घटना आंबेगाव येथे गुरुवारी (ता.१२) मध्यरात्री अडीचच्या सुमारास घडली आहे. या घटनेमुळे परिसरात एकच खळबळ उडाली असून नागरिकांमध्ये दहशतीचे वातावरण तयार झाले आहे.
राहुल दांगट असे मृत्यू झालेल्या व्यक्तीचे नाव आहे. तर सुशांत आरुडे असे खून करणाऱ्या आरोपीचे नाव आहे. याप्रकरणी भारती विद्यापीठ पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, राहुल दांगट आणि सुशांत आरुडे हे दोघेजण मित्र आहेत. त्या दोघांमध्ये पैशावरून गुरुवारी (ता.१२) वाद झाले. . या वादातून आरोपी सुशांत आरुडे याने राहुल दांगट यांना लोखंडी रॉडने मारहाण केली. या मारहाणीत राहुलचा जागीच मृत्यू झाला. त्यानंतर आरोपी सुशांत आरुडे हा घटनास्थळावरून फरार झाला.
दरम्यान, या घटनेची माहिती मिळताच भारती विद्यापीठ पोलीस तातडीने घटनास्थळी दाखल झाले. पोलिसांनी राहुल दांगट यांचा मृतदेह शवविच्छेदन करण्यासाठी पाठविले आहे. पोलिसांनी आरोपी सुशांत आरुडे याच्या विरोधात गुन्हा दाखल करण्यात आला आहे. पोलीस आरोपीच्या मागावर आहेत.
पुढील तपास भारती विद्यापीठ पोलीस करीत आहेत.
