पुणे : “आम्ही कोण आहोत, याची माहिती तुम्हाला नाही. पोलीस आम्हाला काही करू शकणार नाहीत,” असे म्हणून मध्यरात्रीपर्यंत सुरू असलेल्या साउंडवर कारवाई करायला गेलेल्या पोलीस उपनिरीक्षकाला धक्काबुक्की केल्याची घटना खडकी परिसरात घडली असून यात पाच जणांना खडकी पोलिसांनी अटक केली आहे.
मार्केट यार्ड परिसरात एकाने सहाय्यक पोलीस निरीक्षकाला मारहाण केल्याची घटना ताजी असतानाच हा प्रकार उघडकीस आला असल्याने आता पुणे पोलिसांचा धाक राहिला नाही का ? असा प्रश्न उपस्थित होत आहे.
या प्रकरणात सुमित सुभाष मिश्रा (वय २०), रसल एल्वीस जॉर्ज (वय २७), ऋषभ अशोक पिल्ले, निशांत संजय गायकवाड (वय २३), सिद्धार्थ महादेव लोहान (वय २४, सर्व रा. मुळा रस्ता, खडकी) अशी अटक करण्यात आलेल्यांची नावे आहेत. याबाबत पोलीस उपनिरीक्षक अर्जुन बेंदगुडे यांनी खडकी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मुळा रस्त्यावरील त्यागी बंगला परिसरात मध्यरात्री अडीचच्या सुमारास साउंडवर मोठ्या आवाजात गाणी लावून आरोपी नाचत होते. कोणती गाणी वाजवायची, या कारणावरून त्यांच्यामध्ये वाद सुरू होता. साउंडचा आवाज ऐकून रात्रीच्या वेळी गस्त घालणारे पोलीस उपनिरीक्षक अर्जुन बेंदगुडे, सहकारी पोलीस कर्मचारी जाधव तेथे गेले. त्यांनी साउंड बंद करा, असे सांगून कारवाई करण्यास सुरुवात केली.
तेव्हा आरोपींनी अरेरावी सुरू केली. “आम्ही कोण आहोत, याची माहिती तुम्हाला नाही. पोलीस आम्हाला काही करू शकणार नाहीत,” असे सांगून त्या मदमस्त आरोपींनी उपनिरीक्षक बेंदगुडे आणि जाधव यांना धक्काबुक्की केली. पोलिसांच्या वाहनाची चावी काढून घेतली. शासकीय कामात अडथळा आणणे तसेच धक्काबुक्की केल्याप्रकरणी पाच जणांना अटक करण्यात आली असून पोलीस उपनिरीक्षक वैभव मगदूम पुढील तपास करत आहेत.
