बारामती : बारामती येथील सांगवी गावातील राहत्या घरातून रात्री बेपत्ता झालेल्या विवाहित महिलेचा शेतातील झाडाला गळफास घेतलेल्या अवस्थेत मृतदेह आढळून आला आहे. यामुळे परिसरात खळबळ उडाली असून ही आत्महत्या नसून घातपात असल्याची ही सध्या चर्चा सुरू आहे. याबाबत माळेगाव पोलीस ठाण्याचे पोलीस निरीक्षक किरण अवचार यांनी घटनास्थळी जाऊन पाहणी केली.
सविता आप्पासाहेब सालगुडे (रा. सांगवी) (वय 42) असे आत्महत्या केलेल्या विवाहित महिलेचे नाव आहे.
ही घटना शनिवारी दिनांक १७ रोजी सायंकाळी पाच वाजण्याच्या सुमारास उघडकीस आली. महिलेची आत्महत्या नसून घातपात केल्याची देखील चर्चा सुरू आहे. आत्महत्येच्या घटनेनंतर संतप्त नातेवाईकांच्या जमावाने संशयास्पद असलेल्या तरुणाला रस्त्यावर ओढत बेदम मारहाण केली.
मृत सविता सालगुडे या शुक्रवारी दिनांक १६ रोजी राहत्या घरातून रात्री बेपत्ता झाल्या होत्या त्यानंतर घरच्यांनी त्यांचा शोध घेतला असता कुठेही आढळून आल्या नाहीत, दुसऱ्या दिवशी शेतात गवत आणायला गेलेल्या काही महिलांना सविता सालगुडे या बारामती फलटण रस्त्याच्या कडेला शिरवली हद्दीतील शेतात लिंबाच्या झाडाला गळफास घेतलेल्या अवस्थेत आढळून आल्या.
त्यानंतर नातेवाईकांनी त्या ठिकाणी धाव घेतली यावेळी शेतात लिंबाच्या झाडाला मृत महिलेच्या गळ्याला दोरीचा फास लावून तिचे पाय जमिनीला टेकले होते तर शेजारीच बांधावर चप्पल आढळून आली. त्यानंतर महिलेचा मृतदेह रुई ग्रामीण रुग्णालयात शवविच्छेदनासाठी हलवण्यात आला.
याबाबत पुढील तपास माळेगाव पोलीस करीत आहेत.
