पुणे : शहरात ज्येष्ठ नागरिकांच्या फसवणुकीचे सत्र सुरूच आहे. अशातच आता पादचारी ज्येष्ठ महिलाकडे बतावणी करुन चोरट्यांनी त्यांच्याकडील रोकड तसेच ऐवज चोरून नेल्याची संतापजनक घटना घडली आहे. ही घटना शनिवारी १६ नोव्हेंबर रोजी दुपारी एक वाजण्याच्या सुमारास सिंहगड रस्ता आणि कोंढवा भागात घडली आहे. या प्रकरणी एका ज्येष्ठ महिलेने पर्वती पोलीस स्टेशनमध्ये फिर्याद दिली आहे. त्यावरून चोरट्यांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी महिला या गणेशमळा येथील परिसरात राहायला आहेत. त्या नेहमीप्रमाणे शनिवारी दुपारी सिंहगड रस्त्यावरील नवशा मारुती मंदिर परिसरातून निघाल्या होत्या. त्यावेळी दोन अज्ञात चोरट्यांनी त्यांना अडवले. ज्येष्ठ महिलांना मोफत साडी तसेच पैशांचे वाटप करण्यात येत आहे. अशी बतावणी चोरट्यांनी त्यांच्याकडे केली. तुमच्या जवळील दागिने आणि रोकड काढून पिशवीत ठेवा, असे चोरट्यांनी त्या महिलेला सांगितले.
दरम्यान, त्यानंतर चोरट्यांनी महिलेला बोलण्यात गुंतविले. महिलेचे लक्ष विचलित करून, मिळालेलया संधीच सोन करून चोरट्यांनी पिशवीतील दागिने आणि रोकड असा तब्बल ५५ हजार रुपयांचा ऐवज चोरुन नेला आहे. आपली फसवणूक झाली ही बाब महिलेच्या लक्षात येताच तिने पोलिस ठाण्यात धाव घेतली. या प्रकरणी पुढील तपास उपनिरीक्षक पवार करीत आहेत.
तसेच कोंढवा भागातील टिळेकरनगर परिसरात एका ज्येष्ठ नागरिकाकडील बतावणी करुन चोरट्यांनी त्यांच्याकडील ८० हजार रुपयांची सोनसाखळी चोरुन नेल्याची घटना घडली आहे. याबाबत एका ज्येष्ठ नागरिकाने कोंढवा पोलीस ठाण्यात फिर्याद दिली आहे. तक्रारदार ज्येष्ठ नागरिक टिळेकरनगर भागातून निघाले होते. थ्री ज्वेलस सोसायटीसमोर चोरट्यांनी त्यांना अडवून हनुमान मंदिर कोठे आहे, अशी विचारणा केली.
माझ्या मावशीचा मृत्यू झाला आहे. सूतक असल्याने मंदिरात जाऊ शकत नाही. दोन हजार रुपये दान करायचे आहे, अशी बतावणी केली. चोरट्यांनी त्यांना पाचशे रुपयांच्या चार नोटा दिल्या. तुमच्या गळ्यातील सोनसाखळी नोटेला लावा, असे चोरट्यांनी त्यांना सांगितले. त्यानंतर नोटेत सोनसाखळी गुंडाळण्याचा बहाणा केला. त्यावेळी ज्येष्ठ नागरिकाकडील सोनसाखळी चोरुन चोरटे पसार झाले. या घटनेचा पुढील तपास सहायक पोलीस निरीक्षक जाधव करत आहेत.
