गणेश सुळ / केडगाव : शिरूर तालुक्यातील मांडवगण फराटा येथील 4 वर्षाच्या मुलाला बिबट्यानं उसाच्या शेतात फरफटत नेत शरीरापासुन धड वेगळे केल्याची घटना ताजी असतानाच आता दौंड तालुक्यातील बोरीपार्धी हद्दीत अडीच महिन्याच्या बालकावर बिबट्याने जीवघेणा हल्ला केल्याची घटना घडली आहे. बिबट्याने बाळाच्या मानेचा चावा घेतल्याने प्रचंड रक्तस्राव झाला. तातडीने रुग्णालयात दाखल केले, मात्र उपचारादरम्यान चिमुकल्याचा मृत्यू झाला. ही घटना रविवारी (दि १७) दुपारी ४ वाजण्याच्या सुमारास घडली आहे.
याबाबत मिळालेली प्राथमिक माहिती अशी कि, उसाची झोळी करून चिमुकल्याला आईने झोपवले होते. आई-वडील जवळच शेतात ऊसतोड करत होते. सदर कुटुंब करण दिलीप गायकवाड (मुळगाव, शिदवाडी, ता. चाळीसगाव, जि. जळगाव ) सध्या (रा. केडगाव टोल नाका, ता. दौंड, जि. पुणे) हे ऊस गुऱ्हाळावर तोडीसाठी गेल्या पाच वर्षापासून काम करत आहेत.
ऊसतोड (सरगरमळा) बोरीपार्धी येथील बाळासो भागुजी टेंगले यांच्या शेतात सुरु होती. पूर्ण परिसरात ऊस शेती असल्यामुळे शेतात बिबट्या लपल्याचे या मजुरांना समजले नव्हते. त्याच्या भोवती खेळत असलेल्या चिमुकलीने आरडाओरडा केल्यानंतर तिच्यावर होणारा हल्ला टळून तो अडीच महिन्याच्या चिमुरड्यावर झाला. हल्ला झाल्यावर परिसरातील लोकांनी आरडाओरडा केला. बिबट्याने त्या चिमुकल्याला तेथेच सोडून उसात पळ काढला.
ही हृदयद्रावक घटना पाहून गरीब शेतमजूर आई-वडिलांनी हंबरडा फोडत होते. पाहणाऱ्याचे डोळे ओलावले होते. ग्रामीण रुग्णालयात शव विच्छेदनासाठी दाखल करण्यात आले. सहाय्यक वनसंरक्षक दीपक पवार, दौंड वनपरिक्षेत्र अधिकारी राहुल काळे, वनपाल वाय. के. वीर यांनी तात्काळ घटनास्थळी भेट दिली. केडगाव बोरीपार्धी हा प्रचंड लोकवस्ती असलेला परिसर आहे. इथे हल्ला झाल्याने नागरिक हवालदिल आहे. बिबटयाच्या मानवी हल्ल्यात मृत्युमुखी पडण्याची दौंड तालुक्यातील ही पहिलीच घटना आहे. त्यामुळे शेतकरी वर्ग भयभीत झालेला आहे.
गेल्या दोन दिवसापूर्वी शिरूर तालुक्यातील मांडवगण येथे एका चिमुकल्यावर हल्ला झाला होता. जनावरांवर हल्ल्यांचे तर नियमित झाले आहेत. मात्र मानवावर होणाऱ्या या घटनेचे गांभीर्य लक्षात घेऊन केडगाव, बोरीपार्धी व दौंड तालुक्यातील सर्वच ग्रामस्थांनी वनविभागाला कळवले होते. मात्र वन विभागाने याकडे दुर्लक्ष केल्याचे आढळून येते. गेल्या तीन महिन्यात एकही बिबट्या जेरबंद करण्यात वनविभागाला यश आले नाही. त्यामुळे बिबट्याचा फैलाव वाढतच चालला आहे.
शेखर सोडनवर – सदस्य ग्रामपंचायत बोरीपार्थी
