इंदापूर : संपूर्ण महाराष्ट्रात गणेश विसर्जनाची धामधूम सुरू असतानाच पुणे जिल्ह्याच्या इंदापूरमधून एक दुर्दैवी घटना समोर आली आहे. इंदापूरमध्ये गणेश विसर्जनाला गेलेला युवक नदीमध्ये बुडाल्याची घटना घडली आहे. ही घटना इंदापूर तालुक्यातील श्री क्षेत्र निरा नरसिंहपुर गावी नीरा नदीमध्ये मंगळवारी (दि.17) घडली आहे. अनिकेत विनायक कुलकर्णी (वय-१६, रा. हांडुग्री, ता. परांडा, जि. धाराशिव) असे या युवकाचे नाव आहे.
याबाबत घटनास्थळावरून मिळालेल्या माहितीनुसार, अनिकेत हा मागील नऊ वर्षापासुन लक्ष्मी नृसिंह वेदपाठशाळेत शिक्षण घेत होता. आज दुपारी तीन वाजता निरा नरसिंहपुर येथील नीरा नदीच्या लक्ष्मी घाटावर तो गणेश विसर्जनासाठी गेला होता. त्याचवेळी गणेश नीरा नदीमध्ये बुडाला. लक्ष्मी नृसिंह मंदिरालगत नदीत ही घटना घडल्याने गावकऱ्यांसह बघ्यांनी मोठी गर्दी केली आहे.
दरम्यान, तीन वाजल्यापासून होडीच्या मदतीने अनिकेतचा शोध सुरु आहे. तसेच प्रशासनाकडून देखील शर्तीचे प्रयत्न सुरु आहेत. घटनास्थळी गावकरी आणि पोलीस प्रशासन, महसूल प्रशासन दाखल झाले असून होडीच्या मदतीने बेपत्ता अनिकेत याचा शोध घेतला जात आहे.
