संतोष पवार
इंदापूर : डिकसळ (ता. इंदापूर)येथील स्वर्गीय देविदास अनंता कुंभार (सर) यांच्या प्रथम पूण्यस्मरणाचे औचित्य साधून देवा फाउंडेशन डिकसळ आणि गिरिजा ब्लड बँक बारामती यांच्या संयुक्त विद्यमाने रक्तदान शिबिराचे आयोजन करण्यात आले होते. सामाजिक धार्मिक व राजकीय क्षेत्रात योगदान असलेले देविदास कुंभार यांचे एक वर्षापूर्वी निधन झाले. त्यांच्या आठवणींना उजाळा देत डिकसळ येथील देवा फाउंडेशनच्या वतीने वृक्षारोपण रक्तदान शिबीर शालेय विद्यार्थ्यांना साहित्य वाटप आदि प्रकारचे विधायक उपक्रम हाती घेण्यात आले.
त्यांच्या प्रथम पुण्यस्मरणानिमित्त गुरुवार दिनांक १२ सप्टेंबर रोजी सकाळी नऊ ते दुपारी एक वाजेपर्यंत योगेश्वरी लॉन्स येथे रक्तदान शिबिर आयोजित करण्यात आले होते. या शिबिरात सुमारे 35 रक्तदात्यांनी रक्तदान केले. संकलन केलेले रक्त गिरिजा ब्लड सेंटर बारामती यांच्याकडे जमा करण्यात आले. प्रत्येक रक्तदात्यास देवा फाउंडेशनच्या वतीने टी-शर्ट भेट देऊन आभार मानण्यात आले. भविष्यातही देवा फाउंडेशनच्या वतीने अशाच पद्धतीचे समाजपयोगी विधायक उपक्रम हाती घेणार असल्याचे फाउंडेशनच्या वतीने सांगण्यात आले.
