weather update : नागपूर : अरबी समुद्रात कमी दाबाचा पट्टा तयार झाला आहे. परिणामी वातावरणात सातत्याने बदल होत आहे. ऐन हिवाळ्यात काही जिल्ह्यांमध्ये पावसाची शक्यताही भारतीय हवामान खात्याने नोंदवली आहे. राज्यासग देशाच्या हवामानातही मागील काही दिवसांपासून मोठे बदल झाल्याचे दिसून येत आहे. तापमानात मोठ्या प्रमाणावर चढउतार होत असून काही भागात दिवसा कडक ऊन तर पहाटे आणि रात्री थंडी पडत आहे.
धुके आणि धुलिकणांमुळे मुंबई, पुणे, नागपूर व दिल्लीसह देशात अनेक शहरांत प्रदूषण वाढले आहे. राज्याच्या काही भागात पुढील दोन ते तीन दिवस पाऊस होण्याची शक्यता आहे. काही ठिकाणी मध्यम ते हलक्या पावसाच्या सरी कोसळण्याची शक्यता आहे. काही ठिकाणी वातावरण कोरडे किंवा ढगाळ राहण्याची शक्यता आहे.राज्यातील अनेक शहरांमध्ये ऊन आणि थंडी असे दोन्हीही वातावरण अनुभवायला मिळत असल्याने त्याचा आरोग्यावर परिणाम होत आहे. महाराष्ट्रासह राजस्थान आणि पंजाबमध्येही पुढील दोन दिवस पाऊस पडण्याची शक्यता आहे.
वातावरणात बदल फक्त महाराष्ट्रच नाही तर देशपातळीवरही होत आहे. तामीळनाडूत अतिवृष्टी तर कर्नाटक आणि गोव्यावरही पावसाचे सावट असल्यामुळे हिवाळ्यात थंडीची नाही तर पावसाची चर्चा सुरू आहे. उत्तर-पश्चिम भारतात अवकाळी पाऊस होऊ शकतो. तर दहा नोव्हेंबरपर्यंत दक्षिण द्वीपकल्पीय प्रदेशात मुसळधार पाऊस होणार असून हवामान खात्याने ऑरेंज अलर्ट जारी केला आहे. तामिळनाडू आणि कराईकलमध्ये १० नोव्हेंबरपर्यंत अतिवृष्टीचा इशारा देण्यात आला आहे. राजस्थान आणि पंजाबमध्येही पुढील दोन दिवस पाऊस पडण्याची शक्यता आहे.
