Pune News : पुणे : डॉक्टर हे रूग्णांसाठी देवदूत असतात. पुण्यातील एका महिलेला याची प्रचिती नुकतीच आली. तीव्र फुफ्फुसाच्या आजाराने ग्रस्त असलेल्या पुण्यातील एका ५३ वर्षीय महिलेला दुहेरी फुफ्फुस प्रत्यारोपणासाठी अवयवप्राप्तीची गरज होती. त्याचदरम्यान सुरतमधील एका ब्रेनडेड व्यक्तीच्या अवयवदानाचा निर्णय डॉक्टरांनी घेतला होता. सूचना मिळताच डॉक्टरांचे पथक तातडीने सुरतला रवाना झाले. ग्रीन कॉरिडॉर तयार करून या व्यक्तीची दोन्ही फुफ्फुसे विशेष विमानाने पुण्यात आणून त्यांचे महिलेवर यशस्वी प्रत्यारोपण करण्यात आले. अतिशय वेगवान प्रक्रियेमुळे संबंधित महिलेचा जीव वाचला. डॉक्टर या महिलेचा जीव वाचविण्यासाठी देवासारखे धावून आले. पिंपरीतील डीपीयू प्रायव्हेट सुपर स्पेशालिटी हॉस्पिटलमध्ये हे प्रत्यारोपण झाले.
पुण्यातील एक ५३ वर्षीय महिला कबुतरांच्या संपर्कात आल्याने तीव्र फुफ्फुसाच्या आजाराने ग्रस्त होती. तिला २० सप्टेंबरला डीपीयू प्रायव्हेट सुपर स्पेशालिटी हॉस्पिटलमध्ये अतिदक्षता विभागात दाखल करण्यात आले होते. श्वसनास त्रास होत असल्याने व्हेंटिलेटरची आवश्यकता भासू लागली. त्यामुळे तिला रुग्णालयात दाखल करण्यात आले होते. प्रकृती खालावल्याने तिचे नाव दुहेरी फुफ्फुस प्रत्यारोपणासाठी अवयवप्राप्तीच्या प्रतीक्षा यादीत नोंदविले होते.
दरम्यान, २८ सप्टेंबर रोजी पुणे विभागीय अवयव प्रत्यारोपण समन्वय समितीमार्फत योग्य अवयवदाता उपलब्ध झाल्याची माहिती मिळाली. सुरत जिल्हा रुग्णालयामध्ये ४२ वर्षीय मेंदूमृत पुरुषाच्या नातेवाइकांनी अवयवदानाचा निर्णय घेतला. माहिती मिळताच डॉक्टरांचे पथक तातडीने सुरतला रवाना झाले. सुरतच्या जिल्हा रुग्णालयामधून २९ सप्टेंबरला दुपारी चार वाजण्याच्या सुमारास अवयव काढण्यात आले आणि दोन तास १५ मिनिटांत संध्याकाळी सहा वाजून १५ मिनिटांनी पिंपरीतील डीपीयू प्रायव्हेट सुपर स्पेशालिटी हॉस्पिटलमध्ये आणण्यात आले. सुरतहून पुण्याला विशेष विमानाने ही फुफ्फुसे आणण्यात आली. यासाठी सुरतमधील जिल्हा रुग्णालय ते सुरत विमानतळ आणि नंतर पुणे विमानतळ ते डीपीयू प्रायव्हेट सुपर स्पेशालिटी हॉस्पिटल या मार्गावर ग्रीन कॉरिडॉर तयार करण्यात आला. त्याच दिवशी फुफ्फुस प्रत्यारोपण शस्त्रक्रिया करण्यात आली.
आरोग्य सुविधा सक्षम करणे हेच आमचे ध्ये असून, त्याला अत्याधुनिक पायाभूत सुविधांची जोड असेल. सुरत आणि पुण्याच्या वाहतूक पोलिसांचे तसेच अवयवदानाची प्रक्रिया सुलभतेने पार पाडणाऱ्या कुशल डॉक्टरांचे मी अभिनंदन करते.
– डॉ. भाग्यश्री पाटील, प्र-कुलपती, डॉ. डी. वाय. पाटील विद्यापीठ (अभिमत विद्यापीठ
