मुंबई : भविष्यात विज्ञानाच्या मदतीने मृत व्यक्तीला पुन्हा जिवंत करता येईल, या आशेने एका कुटुंबाने 78 वर्षीय व्यक्तीचा मृतदेह तब्बल 4 वर्षे फ्रीजरमध्ये जतन करून ठेवल्याचा धक्कादायक प्रकार मुंबईतील मालाडच्या कुरार गाव परिसरात समोर आला आहे. कोकणीपाडा भागातील एका डे-केअर सेंटरमध्ये हा मृतदेह ठेवण्यात आला होता. परिसरात दुर्गंधी पसरल्यानंतर नागरिकांनी पोलिसांना माहिती दिली आणि त्यानंतर हा प्रकार उघडकीस आला.
पोलिसांच्या प्राथमिक माहितीनुसार, संबंधित वृद्धाचा 9 जून 2022 रोजी कॅन्सरमुळे मृत्यू झाला होता. त्यांच्या मुलीचे अमेरिकेत वास्तव्य असून वडिलांशी तिचे भावनिक नाते होते. अमेरिकेत वापरल्या जाणाऱ्या क्रायोनिक्स तंत्रज्ञानाबाबत कुटुंबाला माहिती होती. मृतदेह अतिशय कमी तापमानात सुरक्षित ठेवला, तर भविष्यात विज्ञानाच्या प्रगतीनंतर त्याला पुन्हा जिवंत करण्याची शक्यता निर्माण होऊ शकते, असा कुटुंबाचा विश्वास असल्याचे पोलिसांनी सांगितले.
याच विचारातून मृतदेह जतन करण्यासाठी डे-केअर सेंटरला दरमहा सुमारे 1.60 लाख दिले जात असल्याची माहिती समोर आली आहे. मात्र, हा मृतदेह नेमका कोणत्या पद्धतीने आणि कोणत्या परिस्थितीत इतका काळ ठेवण्यात आला, याचा तपास सुरू आहे.
दरम्यान, या घटनेमुळे मुंबई महापालिकेच्या कारभारावरही प्रश्न उपस्थित झाले आहेत. संबंधित सेंटरला बीएमसीने सुमारे 3 महिन्यांपूर्वी सील केले होते. मात्र, त्यावेळी तेथे फ्रीजरमध्ये मृतदेह असल्याचे अधिकाऱ्यांच्या निदर्शनास कसे आले नाही, असा सवाल माजी नगरसेवक विनोद मिश्रा यांनी उपस्थित केला आहे.
कुटुंबीयांनी मृत्यू प्रमाणपत्रासह संबंधित कागदपत्रे पोलिसांकडे दिली आहेत. त्यांची पडताळणी सुरू आहे. मृतदेहाची सद्यस्थिती जाणून घेण्यासाठी कूपर रुग्णालयातील तज्ज्ञ डॉक्टरांची मदत घेतली जात आहे. मृतदेह अशा पद्धतीने जतन करणे कायदेशीरदृष्ट्या योग्य होते का, याचाही कुरार पोलिसांकडून तपास केला जात आहे.
