पुणे : मराठा आरक्षण आंदोलनाचे प्रमुख मनोज जरांगे पाटील यांच्या पश्चिम महाराष्ट्र दौऱ्यादरम्यान वापरण्यात आलेली २ कोटी रुपयांची आलिशान ‘डिफेंडर’ गाडी सध्या राज्यभरात मोठ्या चर्चेचा विषय ठरली आहे. सोलापूर जिल्ह्यातील सोन्या-चांदीचे व्यापारी आणि मराठा आंदोलक सुभाष भोसले यांनी जरांगे यांचा प्रवास सुखकर व्हावा आणि आरोग्याला त्रास होऊ नये, या उद्देशाने ही गाडी वापरण्यासाठी दिली होती.मात्र ही गाडी जरांगे यांनी आता परत केली आहे.
या गाडीवरून विरोधी आणि ओबीसी नेत्यांनी जरांगे पाटील यांच्यावर जोरदार टीका केली होती. ‘इतकी महागडी गाडी खरेदी करण्यासाठी पैसे कुठून आले?’ असे सवाल उपस्थित करत विरोधकांनी त्यांना लक्ष्य केले. तरीही, दौऱ्यादरम्यान हजारो समर्थकांनी या गाडीसोबत फोटो व सेल्फी काढत आनंद व्यक्त केला होता.
परंतु, छत्रपती संभाजीनगर येथील रुग्णालयातून डिस्चार्ज मिळाल्यानंतर जरांगे पाटील या गाडीने अंतरवाली सराटी आणि नंतर आपल्या अंकुशनगर येथील घरी पोहोचले. तिथे पोहोचताच ही डिफेंडर गाडी मूळ मालक सुभाष भोसले यांच्याकडे सुपूर्द करण्यात आली. जरांगे यांचे सहकारी गंगाधर काळकुटे यांनी या माहितीला दुजोरा दिला आहे.
गाडी परत करण्यामागे महत्त्वाचे कारण समोर आले आहे. भोसले यांच्या कोलकात्यातील दुकानावर नुकतीच ईडीची कारवाई झाल्याची चर्चा आहे. आपल्यामुळे भोसले यांना अथवा इतर सहकाऱ्यांना शासनाकडून त्रास होऊ नये, म्हणून जरांगेंनी स्वतःहून ही गाडी परत नेण्याचा निरोप पाठवला होता. सरकार आपल्याला घेरण्यासाठी सहकाऱ्यांची चौकशी करत असल्याचा आरोपही जरांगे यांनी केला होता.
दुसरीकडे, ओबीसी नेते नवनाथ वाघमारे यांनी यावर वेगळा दावा केला आहे. तपास यंत्रणांची चौकशी स्वतःपर्यंत पोहोचेल या भीतीपोटीच जरांगे यांनी गाडी मालकाला परत केली, असा आरोप करत त्यांनी या प्रकरणाची सखोल चौकशी करण्याची मागणी केली. आता ही गाडी मूळ मालकाकडे गेल्याने जरांगे यांच्यावरील राजकीय आरोप-प्रत्यारोप शमतील, अशी आशा मराठा समर्थकांकडून व्यक्त केली जात आहे.
