मुंबई : सप्टेंबर महिना संपत असून १ ऑक्टोबरपासून देशात अनेक महत्त्वाचे बदल लागू होणार आहेत. एलपीजी सिलेंडरच्या दरांपासून ते एटीएम व्यवहार, फिक्स्ड डिपॉझिट, एनआरआयच्या मालमत्ता व्यवहारांपर्यंत काही नियमांमध्ये बदल होणार आहेत. या बदलांचा सर्वसामान्यांच्या दैनंदिन व्यवहारांवर परिणाम होऊ शकतो.
प्रत्येक महिन्याच्या पहिल्या दिवशी तेल विपणन कंपन्यांकडून एलपीजी सिलेंडरचे नवे दर जाहीर केले जातात. त्यामुळे १ ऑक्टोबर २०२६ रोजीही घरगुती आणि व्यावसायिक गॅस सिलेंडरचे नवे दर लागू होणार आहेत. मुंबईत सध्या १४.२ किलोच्या घरगुती एलपीजी सिलेंडरची किंमत ९४१.५० रुपये आहे. एलपीजी सबसिडीसाठी आधार बायोमेट्रिक ऑथेंटिकेशन किंवा ई-केवायसी पूर्ण करणे आवश्यक असल्याचेही सांगण्यात आले आहे. याशिवाय १ ऑक्टोबरपासून एलपीजी डिलिव्हरीसाठी ओटीपी आधारित प्रक्रिया लागू होणार असून, डिलिव्हरीच्या वेळी नोंदणीकृत मोबाइलवर आलेला ओटीपी द्यावा लागू शकतो.
तेल कंपन्यांकडून दर महिन्याला विमान इंधन म्हणजेच एअर टर्बाइन फ्युएल (ATF) चे दरही जाहीर केले जातात. त्यामुळे विमान प्रवासाच्या तिकिटांच्या किमतीवरही त्याचा परिणाम होऊ शकतो. मुंबईत सध्या एटीएफचा दर ९८,२४७ रुपये प्रति किलोलीटर असल्याचे सांगण्यात आले आहे.
एसबीआयच्या ग्राहकांसाठीही एटीएम व्यवहारांशी संबंधित बदल सांगण्यात आला आहे. सेव्हिंग आणि सॅलरी अकाऊंटधारकांना मोफत एटीएम व्यवहारांची मर्यादा लागू असून, त्यानंतरच्या व्यवहारांवर शुल्क आकारले जाऊ शकते. सॅलरी अकाऊंटधारकांसाठी मोफत व्यवहारांची मर्यादा १० वरून ५ करण्यात आल्याचे नमूद करण्यात आले आहे.
फिक्स्ड डिपॉझिटच्या नियमांमध्येही १ ऑक्टोबरपासून बदल होणार आहेत. बँकांना एफडीच्या व्याजदरांची माहिती आणि संबंधित तपशील त्यांच्या वेबसाइटवर अद्ययावत ठेवावे लागणार आहेत. एनआरआयकडून स्थावर मालमत्ता खरेदी करताना टीडीएस प्रक्रियेतही बदल करण्यात येणार असून, खरेदीदारांना पॅनच्या माध्यमातून टीडीएस कपात आणि त्याची नोंद करण्याची सुविधा मिळणार आहे.
जन्म-मृत्यू नोंदणीसंदर्भातील नियमांमध्येही बदल होणार आहेत. २१ दिवसांनंतर नोंदणी केल्यास विलंब शुल्क तसेच काही प्रकरणांमध्ये प्रतिज्ञापत्राची आवश्यकता लागू होऊ शकते. याशिवाय कच्चा माल आणि धातूंच्या किमतीतील वाढीमुळे एसी, टीव्ही, फ्रिज यांसारख्या इलेक्ट्रॉनिक वस्तूंच्या किमती वाढण्याची शक्यता व्यक्त करण्यात आली आहे. ऑक्टोबरमध्ये सण आणि साप्ताहिक सुट्ट्यांमुळे बँका अनेक दिवस बंद राहणार असल्याने ग्राहकांनी आरबीआयची सुट्टीची यादी तपासून बँकिंग व्यवहारांचे नियोजन करणे आवश्यक ठरणार आहे.
