आदित्य बोराटे
इंदापूर: इंदापूर शहरातील कुरेशी गल्ली येथे पोलिसांनी मध्यरात्री केलेल्या कारवाईत सुमारे दोन लाख रुपयांचा मुद्देमाल जप्त केला. यामध्ये ६ जर्शी गायी, ३ जर्शी बैल, एक रेडा, २ जर्शी खोंड आणि अंदाजे २५० किलो मांसाचा समावेश आहे. घटनास्थळी जनावरांना चारा-पाण्याची व्यवस्था न करता धोकादायक परिस्थितीत बांधून ठेवल्याचे, तसेच मोकळ्या जागेत कापलेल्या जनावरांचे मांस व कातडी आढळल्याचे पोलिसांच्या कारवाईत समोर आले आहे. या प्रकरणी शब्बीर बाबुलाल कुरेशी व इतरांविरुद्ध इंदापूर पोलीस ठाण्यात गुन्हा दाखल करण्यात आला आहे.
मध्यरात्रीच्या कारवाईने परिसरात खळबळ
पोलिसांनी दिलेल्या माहितीनुसार, ११ ऑक्टोबर रोजी रात्री १२.३० ते पहाटे २.१५ या वेळेत मिळालेल्या माहितीच्या आधारे इंदापूर पोलिसांचे पथक पंचांसह कुरेशी गल्ली येथे पोहोचले. पोलिसांची चाहूल लागताच संबंधित आरोपी अंधाराचा फायदा घेऊन पळून गेल्याचे फिर्यादीत म्हटले आहे. त्यानंतर पोलिसांनी पंचांसमक्ष पत्र्याच्या शेडसह परिसरातील मोकळ्या जागेची पाहणी केली.
या पाहणीत काही गायी, बैल, रेडा आणि वासरे यांना चारा-पाण्याची व्यवस्था न करता त्यांच्या जिवाला धोका निर्माण होईल अशा परिस्थितीत बांधून ठेवल्याचे आढळले. तसेच परिसरात जमिनीवर कापलेल्या जनावरांचे मांस आणि कातडी पडलेली असल्याचे निदर्शनास आले. पोलिसांनी ही जनावरे ताब्यात घेतली असून, त्यांच्या चारा-पाण्याची व्यवस्था होण्यासाठी गोशाळेत ठेवण्याची तजवीज केली आहे.
मांसाचे नमुने तपासणीसाठी सीलबंद
घटनास्थळी आढळलेल्या मांसाचे नमुने पोलिसांनी पंचांसमक्ष तपासणीसाठी घेतले असून, ते सीलबंद करून ठेवण्यात आले आहेत. जप्त केलेल्या मांसाची विल्हेवाट लावण्यासाठी इंदापूर नगरपरिषदेला पत्र देण्याची प्रक्रिया करण्यात येणार असल्याचेही फिर्यादीत नमूद आहे.
दोन लाखांचा मुद्देमाल जप्त
या कारवाईत ९० हजार रुपये किमतीच्या सहा जर्शी गायी, ६० हजार रुपये किमतीचे तीन जर्शी बैल, १५ हजार रुपये किमतीचा एक काळ्या रंगाचा रेडा, १० हजार रुपये किमतीचे दोन जर्शी खोंड आणि २५ हजार रुपये किमतीचे अंदाजे २५० किलो मांस, असा एकूण दोन लाख रुपयांचा मुद्देमाल जप्त करण्यात आला आहे.
या प्रकरणी पोलीस शिपाई विठ्ठल भारत गिरी यांनी फिर्याद दिली असून, भारतीय न्याय संहिता २०२३ चे कलम ३२५, प्राण्यांचा छळ प्रतिबंधक अधिनियम १९६० चे कलम ११ तसेच महाराष्ट्र पशुसंवर्धन अधिनियम १९७६ मधील नमूद कलमांनुसार गुन्हा दाखल करण्यात आला आहे. पुढील तपास पोलीस हवालदार शिंदे करीत आहेत.
