पुणे : शाळेत मस्ती केल्याच्या कारणावरून 3 वर्षांच्या चिमुकल्याला स्वच्छतागृहात बंद केल्याचा गंभीर आरोप पुण्यातील घोरपडी परिसरातील युरो किड्स शाळेतील शिक्षिकेवर करण्यात आला आहे. या प्रकरणी मुलाच्या आईने तक्रार दाखल केल्यानंतर मुंढवा पोलिसांनी संबंधित शिक्षिका आणि शाळेच्या व्यवस्थापिकेविरुद्ध गुन्हा नोंदवला आहे. सीसीटीव्ही चित्रीकरणावरूनही पालकांनी प्रश्न उपस्थित केले आहेत.
ही घटना 8 सप्टेंबर रोजी बी. टी. कवडे रस्त्यावरील शाळेत घडल्याचे तक्रारीत नमूद आहे. सकाळी 11:15 ते दुपारी 2:15 या कालावधीत हा प्रकार घडल्याचा आरोप आहे. संबंधित चिमुकला शाळेत नर्सरीमध्ये शिकत असून, त्याला घरी घेऊन जाण्यासाठी आई शाळेत पोहोचली होती.
त्यावेळी मुलाला मस्ती केल्यामुळे एका खोलीत बंद केल्याचे शिक्षिकेने आईला सांगितल्याचा दावा आहे. मात्र, आईने मुलाशी बोलल्यानंतर त्याला खोलीत नव्हे, तर स्वच्छतागृहात डांबून ठेवल्याचे त्याने सांगितले. त्यामुळे या घटनेची खातरजमा करण्यासाठी आईने शाळा व्यवस्थापनाकडे सीसीटीव्ही फुटेज दाखवण्याची मागणी केली.
पालकांच्या आरोपानुसार, व्यवस्थापनाने सुरुवातीला चित्रीकरण दाखवण्यास टाळाटाळ केली. त्यानंतर वारंवार पाठपुरावा केल्यानंतर 21 सप्टेंबर रोजी त्यांना फुटेज दाखवण्यात आले. या चित्रणात शिक्षिका मुलाला काही वेळासाठी स्वच्छतागृहात बंद करताना दिसत असल्याचे आईने तक्रारीत म्हटले आहे.
या प्रकरणात सीसीटीव्ही फुटेजबाबत आणखी एक मुद्दा समोर आला आहे. संबंधित चित्रण दुसऱ्याच दिवशी ओव्हरराइट झाल्याचे शाळा व्यवस्थापनाने सांगितल्याचा आरोप पालकांनी केला आहे. त्यामुळे या घटनेबाबत अधिक तपास करण्याची मागणी होत आहे.
मुलाच्या आईने दिलेल्या तक्रारीच्या आधारे मुंढवा पोलिसांनी शिक्षिका आणि व्यवस्थापिकेविरुद्ध गुन्हा दाखल केला आहे. या प्रकरणातील आरोपांची सत्यता आणि सीसीटीव्ही फुटेजसंबंधीचे मुद्दे पुढील तपासातून स्पष्ट होतील.
