धाराशिव : कला केंद्रातील वादातून गर्भवती नर्तिका पिंकी काटकर हिची हत्या केल्याचा आरोप असलेल्या प्रकरणात धाराशिव पोलिसांनी 4 जणांना अटक केली आहे. पिंकीचा मृतदेह धाराशिवपासून सुमारे 275 किलोमीटर अंतरावर धुळे जिल्ह्यातील जंगलात नेऊन जाळण्यात आल्याचे तपासात समोर आले आहे. या प्रकरणातील आरोपी सर्फराज अलीम मोमीन याच्याविरोधात यापूर्वीही विविध गुन्हे दाखल असल्याची माहिती पोलिस नोंदीत आहे.
सर्फराजविरोधात एका महिलेने केलेल्या तक्रारीत गंभीर आरोप करण्यात आले आहेत. संबंधित महिला विवाहित असून तिला 2 मुले आहेत. 2023 मध्ये पुण्यात कामासाठी आल्यानंतर तिची एका महिलेशी ओळख झाली. अधिक पैसे मिळतील असे सांगून तिला धाराशिवमधील गौरी कला केंद्रात नेण्यात आल्याचा आरोप आहे.
तेथे सर्फराजने वेगळ्या नावाने तिच्याशी जवळीक वाढवली. त्यानंतर फोटो आणि व्हिडीओचा वापर करून लग्नासाठी दबाव आणल्याचे महिलेने तक्रारीत म्हटले आहे. एका विवाहित महिलेला खोटे नाव सांगून बळजबरीने लग्न करून मुस्लिम धर्म स्वीकारायला लावला. पुढे तिला वाशीम जिल्ह्यातील एका धार्मिक व्यक्तीकडे नेऊन धर्म बदलण्यासाठी दबाव टाकला. विरोध केल्यावर धमक्या देण्यात आल्या आणि तिच्यावर मानसिक व शारीरिक अत्याचार केल्याचा आरोप आहे.
इच्छेविरोधात नमाज व कलमा वाचून तिला धर्मातर करायला भाग पाडून हातावर मुस्लिम धर्माचा टॅटू काढण्यास सांगितल्याचा आरोप आहे. तसेच तिला जबरदस्तीने बैलाचे मटण खायला दिल्याचेही तिने तक्रारीत नमूद केले आहे. यानंतर तिला वेगवेगळ्या 2 ते 3 कला केंद्रांमध्ये नेऊन मारहाण करण्यात आली आणि तेथे नृत्याचे काम करण्यासाठी दबाव आणल्याचा आरोप महिलेने केला आहे.
तक्रारीनुसार, महिलेला विविध ठिकाणच्या कला केंद्रांमध्ये नेऊन काम करण्यास भाग पाडण्यात आले. बीड, संभाजीनगर, वाशीम, नांदेड आणि धाराशिव या जिल्ह्यांमध्ये तिच्यावर अत्याचार केल्याचेही आरोप तिने केला आहे. एका ठिकाणाहून पळून जाण्याचा प्रयत्न केल्यानंतर तिला पुन्हा पकडून आणल्याचेही तक्रारीत नमूद आहे.
महिलेच्या तक्रारीनुसार, आरोपी तिला बीड जिल्ह्यातील मांजरसुंबा येथील जगदंबा कला केंद्रात घेऊन गेला. तेथे तो पार्टी मालक म्हणून काम पाहत होता. या ठिकाणी महिलेला मारहाण करून काम करण्यास भाग पाडल्याचा आरोप आहे. तसेच, ‘मी मुली आणून देतो, त्यांच्याकडून काम करून घे’, असे तो तेथील व्यक्तींना सांगत असल्याचेही तक्रारीत नमूद आहे.
या परिस्थितीतून बाहेर पडण्यासाठी महिलेने तेथून पळून जाण्याचा प्रयत्न केला. मात्र, तिला पुन्हा पकडून कला केंद्रात आणण्यात आल्याचा आरोप आहे. काही काळानंतर जगदंबा कला केंद्र बंद झाल्यावर आरोपीने तिला महाकाली कला केंद्रात नेले. मी मुली आणुन देतो, त्या मुलींकडून धंदा करून घे, असेही सांगितले. तेथे त्याने हिंदू नावाचा वापर करून पार्टी सुरू केल्याचे तक्रारीत सांगण्यात आले आहे.
महिलेने पुन्हा तेथून निसटण्याचा प्रयत्न केला आणि लातूर गाठले. मात्र, तिच्या मोबाईलच्या लोकेशनच्या माध्यमातून आरोपीने तिचा शोध घेतला. त्यानंतर तिला पकडून मारहाण केल्याचा आणि पुन्हा महाकाली कला केंद्रात आणल्याचा आरोप आहे.
याच काळात आरोपीने तलवारीने हल्ला केल्याचेही तक्रारीत नमूद आहे. मात्र, या हल्ल्यात संबंधित महिलेला न लागता तिच्या मैत्रिणीला तलवारीचा वार झाल्याचा दावा करण्यात आला आहे.
महिलेने अखेर पोलिसांकडे धाव घेतल्यानंतर या प्रकरणाला वाचा फुटली. पुणे शहरातील खडक पोलिस ठाण्यात भारतीय न्याय संहितेतील कलम 115(2), 351(2), 352, 64 आणि 64(2)(m) अंतर्गत झिरो गुन्हा नोंदवण्यात आला होता. पुढील तपासासाठी हा गुन्हा धाराशिव ग्रामीण पोलिसांकडे वर्ग करण्यात आला. दरम्यान, हत्या प्रकरणाचा तपासही सुरू असून आरोपी सर्फराजविरोधातील इतर प्रकरणांची माहिती पोलिसांकडून तपासली जात आहे.
