Maharashtra Weather : पुणे : कार्तिक एकादशी ते कार्तिक पौर्णिमा म्हणजे 23 ते 26 नोव्हेंबर दरम्यान राज्यात काही ठिकाणी पावसाची शक्यता जाणवत असल्याची शक्यता ज्येष्ठ हवामान तज्ज्ञांनी सांगितल आहे. राज्यातील वातावरणात सातत्यानं बदल होत आहे. कुठं ढगाळ वातावरण आहे तर कुठं थंडीचा कडाका आहे. सध्या राज्यातील बळीराजा मात्र चिंतेत आहे. कारण पाण्याअभावी रब्बी पिकं माना टाकू लागली आहेत.
‘या’ जिल्ह्यात पावसाची शक्यता
अरबी समुद्रात चक्रीय वाऱ्याची स्थिती निर्माण झाली आहे. त्यामुळं महाराष्ट्रातील काही भागात पावसाची शक्यता जाणवत आहे. यामध्ये मुंबई, रायगड, रत्नागिरी, सिंधुदुर्ग, कोल्हापूर तसेच नाशिक नगर पुणे सातारा सांगली सोलापूर धाराशिव लातूर नांदेड परभणी हिंगोली यवतमाळ चंद्रपूर जिल्ह्यात ढगाळ वातावरण राहील. तसेच तुरळक ठिकाणी पावसाची शक्यता देखील आहे. हा पाऊस रब्बीतील ज्वारी, हरभरा पिकांना वरदान ठरण्याची शक्यता आहे.
दरवर्षी जशी थंडी असते तशीच थंडी उर्वरित नोव्हेंबर महिन्यात असेल. 30 नोव्हेंबरपर्यंत 14 ते 16 डिग्री दरम्यान किमान तापमान असु शकते. या महिन्याच्या शेवटच्या आठवड्यात थंडी कमी जाणवण्याची शक्यता आहे. खान्देशात थंडीचे प्रमाण अधिक असण्याची शक्यता आहे.
डिसेंबरमध्ये बंगालच्या उपसागरात चक्रीवादळाची शक्यता
आजपासून पंधरा दिवसानंतर म्हणजे डिसेंबरच्या पहिल्या आठवड्यात 5 ते 6 डिसेंबरला बंगालच्या उपसागरात पुन्हा एखाद्या चक्रीवादळाची शक्यता आहे. पावसासाठी पूरक ठरत असतो तो धन आयओडी पुढील महिन्यात डिसेंबरअखेर नामशेष होण्याच्या मार्गांवर असल्याचे माणिकराव खुळे म्हणाले. तसेच एमजेओ सध्या फेज 2 मध्ये असून तो माघारी फिरुन 6 मध्ये जाण्याची शक्यता आहे. त्यामुळं डिसेंबरमधील चंपाषष्टी दरम्यान पडणाऱ्या पावसाची शक्यताही मावळली असल्याचे माणिकराव खुळे म्हणाले.
