पुणे : राज्याच्या बहुतांश भागात मुसळधार पावसाचा हाहाकार बघायला मिळाला आहे. त्यामुळे अनेक भागात जनजीवन विस्कळीत झाले आहे. नदी नाले दुथडी भरुन वाहत आहेत. दरम्यान, आजही राज्यात मुसळधार ते अतिमुसळधार पावसाची शक्यता हवामान विभागाकडून वर्तवण्यात आली आहे.
मुसळधार पावसाचा इशारा..
हवामान विभागानं दिलेल्या माहितीनुसार, रायगड, रत्नागिरी आणि सातारा या तीन जिल्ह्यांना पावसाचा रेड अलर्ट जारी करण्यात आला आहे. तसेच तिथं अतिमुसळधार पावसाची शक्यता वर्तवण्यात आली आहे. तर मुंबईसह ठाणे, पालघर, सिंधुदुर्ग आणि कोल्हापूर या जिल्ह्यांना पावसाचा ऑरेंज अलर्ट जारी करण्यात आला आहे. त्याचबरोबर धुळे आणि नंदुरबार जिल्ह्यांना पावसाचा यलो अलर्ट जारी करण्यात आला आहे. विदर्भातील अमरावती, वर्धा, चंद्रपूर, गडचिरोली, नागपूर, भंडारा, गोंदिया या जिल्ह्यांना पावसाचा यलो अलर्ट जारी करण्यात आला आहे.
पुण्यात पावसाचा धुमाकूळ
पुणे शहर परिसरात काल आणि परवा रात्री झालेल्या मुसळधार पाऊस कोसळल्यामुळे पुण्यातील जनजीवन विस्कळीत झाल्याचं पाहायला मिळालं. पावसाचा मोठा फटका पुण्याला बसला आहे. अनेक ठिकाणी पाणी साचल्याच्या घटना समोर आल्या आहेत. मुसळधार पावसामुळे खडकवासला धरणातून सोडण्यात येणारा पाण्याच्या विसर्ग वाढवण्यात आला आहे. यामुळे मुठा नदी पात्र देखील दुधडी भरून वाहत आहे.
मुसळधार पावसामुळे सिंहगड रस्त्यावरील सोसायट्यांमध्ये पाणी शिरलं आहे. एकता नगर परिसरातील द्वारका, जलपूजन, शारदा सरोवर, शाम सुंदर या सोसायट्या पाण्याखाली गेल्या आहेत. सिंहगड परिसरातील निंबजनगर परिसरातील सोसायट्यांमध्ये देखील मोठ्या प्रमाणावर पाणी साचलं आहे. सिंहगड परिसरातील या सोसायट्यांमध्ये पाणी साचलं होतं. खडकवासल्यातून होणारा विसर्ग कमी केल्याने साचलेले पाणी ओसरण्यास सुरूवात झाली असून प्रशासनाचे बचावकार्य सुरु आहे.
