गुजरात : गुजरातमधून एक धक्कादायक आणि माणुसकीला काळिमा फासणारी एक घटना घडली आहे. एका विवाहित महिलेचे एका तरुणाशी अनैतिक संबंध असल्याच्या आरोपावरून स्थानिक नागरिकांकडून तिला अर्धनग्न करत तिची धिंड काढण्यात आली. या घटनेमुळे गुजरातचे समाजमन हेलावून गेले आहे.
गुजरातच्या दाहोद जिल्ह्यात ही घटना घडली आहे.
दाहोद जिल्ह्यातील एका गावातल्या 35 वर्षांच्या विवाहित महिलेचे गावातल्या एका तरुणाशी अनैतिक संबंध असल्याचा आरोप आहे. ती त्या तरुणाला भेटायला गेल्याचं लोकांना माहित झालं. तेव्हा 15 जणांकडून तिला अर्धनग्न करण्यात आलं. त्यानंतर त्यांनी तिला चेनने बाईकला बांधलं आणि रस्त्यावर फरफटत नेट तशाच अर्धनग्नावस्थेत गावभर फिरवण्यात आलं. यादरम्यान तिला मारहाणही करण्यात आली. या क्रूरतेचा व्हिडिओही शूट करण्यात आल्यानंतर त्याला सोशल मीडियावर शेअर करण्यात आलं. हा व्हिडिओ सद्या सोशल मीडियावर व्हायरल होत आहे.
पोलिसांकडे तक्रार दाखल झाल्यानंतर पोलिसांनी कारवाई सुरू केली आहे. याप्रकरणी 15 पैकी 12 आरोपींना अटक करण्यात आली आहे. तर तीन आरोपींचा शोध सुरू आहे. या घटनेमुळे जिल्ह्यासह राज्यातही खळबळ उडाली आहे. पीडितेने तक्रार केल्यानंतर तिचे सासरे बहादूर कांती डामोर, संजय बहादूर डामोर, कीर्तन कांती डामोर, राजू धर्मेंद्र राजू डामोर, हंसा राजू डामोर, हिमंत डाभोर, रमीला सिसोदिया, सीता विनोद, चंपा बहादूर डामोर, गोविंद भारत डामोर, कल्याण डामोर, हिमत गेदल डामोर, वर्षा पप्पू डामोर, विक्रम बहादूर पगी यांच्याविरुद्ध कारवाई करण्यात आली आहे.
यामध्ये तिच्या सासरकडच्या कुटुंबीयांचाही समावेश आहे. तसेच काही महिलाही आरोपींमध्ये आहेत. हा सर्व प्रकार बघणाऱ्यांपैकीही एकालाही पीडितेची दया आली नाही. यावरून अनेक प्रश्न उपस्थित केले जात आहेत.
