सोलापूर : लग्नासाठी सतत दबाव टाकणे आणि खासगी छायाचित्रे सोशल मीडियावर प्रसारित करण्याची धमकी दिल्याच्या आरोपातून सोलापूर जिल्ह्यातील दक्षिण सोलापूर तालुक्यात एक धक्कादायक घटना घडली आहे. या त्रासाला कंटाळून 18 वर्षीय विद्यार्थिनीने आत्महत्या केल्याची माहिती समोर आली आहे. अमूल्या मल्लिकार्जुन भुरळे असे मृत तरुणीचे नाव आहे. या प्रकरणी रविकांत महादेव सुरवसे याच्याविरोधात पोलिसांनी गुन्हा दाखल केला आहे.

मिळालेल्या माहितीनुसार, रविकांत सुरवसे हा अमूल्याला लग्न करण्यासाठी वारंवार आग्रह करत होता. माझ्याशी लग्न केले नाही तर तुझे खासगी फोटो सोशल मीडियावर व्हायरल करेन, अशी धमकी तो देत असल्याचा आरोप तिच्या वडिलांनी तक्रारीत केला आहे. या सततच्या त्रासामुळे अमूल्या मानसिक तणावाखाली होती, असे फिर्यादीत नमूद करण्यात आले आहे.
मंगळवारी रात्री अमूल्याने राहत्या घरी आत्महत्या केली. ही बाब लक्षात येताच कुटुंबीय आणि नातेवाईकांनी तिला तातडीने रुग्णालयात दाखल केले. मात्र, डॉक्टरांनी तपासणी केल्यानंतर तिला मृत घोषित केले. या घटनेमुळे भुरळे कुटुंबावर दुःखाचा डोंगर कोसळला आहे.

अमूल्या डिप्लोमा अभ्यासक्रमाच्या द्वितीय वर्षात शिकत होती. तिच्या निधनामुळे परिसरात हळहळ व्यक्त होत आहे. या प्रकरणी अमूल्याचे वडील मल्लिकार्जुन भुरळे यांनी सिव्हिल पोलीस चौकीत तक्रार दाखल केली. त्यानुसार पोलिसांनी रविकांत महादेव सुरवसे याच्याविरोधात गुन्हा नोंदवला असून पुढील तपास सुरू आहे.






