नसरापूर, ता. 19 : भोर तालुक्यातील सांगवी बुद्रुक येथील पोलिस पाटील अशोक साधू येनपुरे (वय-50) यांच्या खूनप्रकरणी राजगड पोलिसांनी वेगाने तपास करत तिघांना ताब्यात घेतले आहे. घटनेच्या दुसऱ्याच दिवशी रात्री ही कारवाई करण्यात आली. बुधवारी (ता. 18) न्यायालयात हजर केले असता तिघांना सहा दिवसांची पोलिस कोठडी सुनावण्यात आली.

प्रतीक रामदास शेजवळ (वय-22, रा. सांगवी बुद्रुक), प्रज्वल ऊर्फ प्रशांत संतोष गोगावले (वय 18 वर्षे 3 महिने) आणि प्रणव कैलास गोगावले (वय-19, दोघेही रा. गोगलवाडी, ता. हवेली) अशी ताब्यात घेतलेल्या संशयितांची नावे आहेत.
सांगवी बुद्रुकचे पोलिस पाटील अशोक येनपुरे यांच्यावर सोमवारी (ता. 16) सायंकाळी सहा वाजण्याच्या सुमारास कोयत्याने हल्ला करण्यात आला होता. या हल्ल्यात त्यांचा मृत्यू झाला. या प्रकरणी त्यांचा मुलगा शुभम येनपुरे यांनी राजगड पोलिस ठाण्यात फिर्याद दिली होती. फिर्यादीत त्यांनी जवळचा नातेवाईक प्रतीक शेजवळ आणि अन्य दोघांवर संशय व्यक्त केला होता.

त्यानुसार राजगड पोलिस ठाण्याचे पोलिस निरीक्षक संतोष जाधव यांच्या मार्गदर्शनाखाली सहाय्यक पोलिस निरीक्षक चेतन मछले आणि त्यांच्या पथकाने तपासाची चक्रे वेगाने फिरवत घटनेच्या दुसऱ्याच दिवशी तिन्ही संशयितांना ताब्यात घेतले. तिघांना बुधवारी न्यायालयात हजर करण्यात आले.
दरम्यान गुन्ह्यामागील उद्देश स्पष्ट करणे, हल्ल्यात वापरलेले हत्यार जप्त करणे आणि अन्य बाबींचा तपास करण्यासाठी तपास अधिकारी सहाय्यक पोलिस निरीक्षक चेतन मछले यांनी पोलिस कोठडीची मागणी केली. न्यायालयाने ती मान्य करत तिघांना सहा दिवसांची पोलिस कोठडी सुनावली.






