पुणे : कॉकरोच जनता पार्टी दिवाळीनंतर पुन्हा एकदा सक्रिय झाली आहे.सीजेपीने आता आपला मोर्चा पश्चिम महाराष्ट्रातील सरकारी शाळांकडे वळवला आहे. पक्षाचे संस्थापक अभिजीत दिपके यांनी ‘स्कूल ठीक करो’ हे आंदोलन यापुढेही सुरूच ठेवण्याचा निर्धार व्यक्त केला असून, याअंतर्गत आता सातारा, कोल्हापूर, सांगली आणि सोलापूर जिल्ह्यांतील शाळांची पाहणी केली जाणार आहे. यापूर्वीच दिपके यांनी हिंगोलीतील जिल्हा परिषद शाळेची दुरवस्था समोर आणली होती, तसेच नाशिकमधील शाळांचीही त्यांनी तपासणी केली होती.

याआधी नीट परीक्षा आणि सीएसआर निधीच्या मुद्द्यावरून सीजेपीने केंद्र सरकारला चांगलेच धारेवर धरले होते. केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी केल्यानंतर पक्षाने देशभरातील सरकारी शाळांच्या स्थितीचा आढावा घेण्यास सुरुवात केली होती. दिवाळीनंतर पुन्हा एकदा सक्रिय होण्याचे संकेत पक्षाने दिले होते, त्यानुसार आता महाराष्ट्रातील शाळांच्या पाहणीचा मोठा निर्णय घेण्यात आला आहे.
दरम्यान, केंद्रीय मुख्य निवडणूक आयुक्त ज्ञानेश कुमार यांच्या राजीनाम्यासाठीही अभिजीत दिपके यांनी आक्रमक पवित्रा घेतला होता. मात्र, दिल्ली पोलिसांनी त्यांच्याकडून प्रतिबंधात्मक बॉन्डवर स्वाक्षऱ्या घेतल्याने धर्मेंद्र प्रधान यांच्याविरोधात जसे तीव्र आंदोलन उभारले गेले, तसे आंदोलन ज्ञानेश कुमार यांच्याविरोधात करता आले नाही. परवानगी नसतानाही जंतरमंतरवर आंदोलन केल्याप्रकरणी आशुतोष रांका यांच्यासह पक्षाच्या प्रमुख पदाधिकाऱ्यांना तुरुंगवासही भोगावा लागला होता.

गेल्या काही दिवसांपासून दिपके यांनी निवडणूक आयुक्तां विरोधातील सोशल मीडिया पोस्ट आणि वक्तव्ये थांबवून आपले संपूर्ण लक्ष आता महाराष्ट्रातील शैक्षणिक प्रश्नांवर केंद्रित केले आहे.






