तुर्की : तुर्की आणि सीरियामध्ये ६ फेब्रुवारीला विनाशकारी भूकंप झाला. या भूकंपात आत्तापर्यंत ३० हजाराहून अधिक नागरिकांचा मृत्यू झाल्याची माहिती समोर येत आहे. मात्र या भूकंपातून १२८ तास ढिगाऱ्याखाली अडकलेल्या दोन महिन्यांच्या चिमुकल्याला शनिवारी (ता.११) बचाव पथकाने बाहेर सुखरूप बाहेर काढले आहे. या चिमुकल्याने मृत्यूलाही चकवा देत ‘जाको राखे सैयां मार सके ना कोई’ ही म्हणही खरी ठरवली.
या भूकंपात शेकडो टन वजनाच्या ढिगाऱ्याखालून लोक सुखरूप बचावल्याच्या अनेक घटना समोर येत आहेत. तुर्कीतील हाताय येथे शनिवारी ढिगाऱ्याखालून दोन महिन्यांच्या बाळाला सुखरुप बाहेर काढण्यात आले आहे. त्यानंतर मृत्यूवर मात केलेल्या या चिमुकल्यासाठी जमावाने टाळ्या वाजवून स्वागत केले आहे. या चिमुकल्याला वाचवल्याचा आनंद मदत आणि बचाव पथकाच्या चेहऱ्यावर दिसत होता. भूकंपानंतर सुमारे ५ दिवस आणि ८ तासांनी हे बाळ सुखरुप सापडले आहे.
दरम्यान, या भूकंपामुळे हजारो घरे आणि इमारती पत्त्याच्या बंगल्याप्रमाणे कोसळल्या. ढिगाऱ्याखाली अडकून अनेक नागरिकांचा मृत्यू झाला. अद्यापही ढिगाऱ्याखाली अनेक नागरिक अडकले आहेत. भूकंपाच्या ठिकाणी भारतीय राष्ट्रीय आपत्ती प्रतिसाद दल (NDRF) आणि तुर्की प्रशासनाकडून मदत आणि बचाव पथकांकडून युद्धपातळीवर मदत आणि बचावकार्य सुरु आहे.
