पंढरपूर : पंढरपुरातून एक हृदयद्रावक घटना समोर आली आहे. मुलाच्या लग्नाच्या वरातीत नाचताना बापाचा मृत्यू झाल्याची घटना घडली आहे. सुभाष देवमारे असं मयत बापाचं नाव आहे. या दुर्दैवी घटनेमुळे हळदीच्या लग्नमंडपात शोककळा पसरली. तसेच संपूर्ण गाव हळहळ व्यक्त करत आहे.
मिळालेल्या अधिक माहितीनुसार, सुभाष देवमारे यांचा मुलगा अमित देवमारे या तरुणाचा आज दुपारी लग्न सोहळा आयोजित करण्यात आला होता. दरम्यान काल रात्री हळदीची वरात सुरू असताना डॉल्बीचा दणदणाट सुरु होता. नवरदेवाची वरात छत्रपती शिवाजी महाराज चौकात पोहचली. वरात आल्यानंतर डॉल्बीच्या कर्कश आवाजामुळे नवरदेवाची वडील सुभाष देवमारे हे जागेवरच कोसळले.
त्यांना तातडीने खासगी रूग्णालयात उपचारासाठी दाखल करण्यात आले होते. मात्र, उपचारादरम्यान देवमारे यांचा मृत्यू झाला. डॉल्बिच्या कर्कश आवाज आणि दणदणाटामुळे मृत्यू झाल्याची चर्चा सुरू आहे. लग्नाच्या दिवशीच आपल्या वडिलांचा मृत्यू झाल्याने नवरदेवाने टाहो फोडला.
सध्या सर्वत्र लग्नसराई धूम सुरू आहे. लग्नाच्या वरातीमध्ये तसेच इतर कार्यक्रमध्ये देखील सर्रासपणे डॉल्बीचा वापर केला जातो. डॉल्बीच्या दणदणाटामुळे यापूर्वी अशा अनेक लोकांचा जीव गमावला आहे. मात्र कर्कश आवाज सोडून दणदणाट करणाऱ्या डॉल्बिवर मात्र पोलिस कारवाई करताना दिसत नाहीत. नियमापेक्षा जास्त डेसिबल आवाज सोडणाऱ्या डॉल्बीवर कडक कारवाई करावी अशी मागणी नागरिक करत आहेत.
