पंढरपूर: देशातील तृतीयपंथी आणि जोगतीण यांचे आराध्य दैवत म्हणून ओळख असणाऱ्या कासेगाव येथील यल्लमा देवीच्या मंदिरात पहाटे चोरी झाली. चोरटयांनी देवीच्या चांदीच्या मूर्ती आणि पादुकांसह जवळपास 10 लाखांचे दागिने चोरी केल्याचे समोर आले आहे. चोरीची ही घटना उघड होताच एकच खळबळ उडाली आहे. घटनास्थळी दाखल झालेल्या पोलिसांनी आता वेगाने तपास सुरू केला आहे. या प्रकरणी चोरांना पोलिसांनी तातडीने अटक करावी अशी मागणी ग्रामस्थ आणि भाविकांनी केली आहे.
आज पहाटे दोन नंतर पुजाऱ्याच्या घराला बाहेरून कडी लावत मागील दाराने आत येऊन चोरांनी दोन दरवाज्याची कुलुपे तोडली आणि मंदिरात प्रवेश केला. या अज्ञात चोरांनी पहाटेच्या सुमारास ही चोरी केल्याचे पुजारी मुकुंद जाधव यांनी सांगितले. आज पहाटे पाच वाजता पुजारी जाधव हे मंदिरात आल्यावर त्यांना ही घटना समजली. यानंतर तातडीने पुजाऱ्यांनी पोलिसांना याची माहिती दिली. त्यानंतर पोलीस घटनास्थळी पोहचले.
