अहिल्यानगर : उपमुख्यमंत्री एकनाथ शिंदे यांच्या विरोधात संजय राऊत यांनी केलेल्या वक्ताव्यावरून अहिल्यानगरला दिल्ली गेट येथे संजय राऊत यांच्या फोटोला जोडे मारत आंदोलन करण्यात आले आहे. तसेच संजय राऊत यांच्या तोंडाला जो काळे फासेल, त्यास एक लाख रुपये बक्षीस यावेळी शिवसेना शिंदे गटाचे शहर प्रमुख सचिन जाधव यांच्याकडून जाहीर करण्यात आले आहे.
नेमकं काय म्हणाले होते संजय राऊत?
एकनाथ शिंदे हा कायमच अस्वस्थ आत्मा आहे. त्याने खरं म्हणजे महाकुंभमेळ्यात जाऊन नागा साधू बरोबर बसायला पाहिजे होतं, नागा साधूही फार अस्वस्थ असतो. असे विधान राऊत यांनी केले होते. या वक्तव्याचा निषेध करत अहिल्यानगर शहरात दिल्लीगेट येथे शिवसेनेच्या वतीने खासदार संजय राऊत यांच्या प्रतिमेस जोडे मारो आंदोलन करण्यात आले. खासदार संजय राऊत यांनी केलेले वक्तव्य चुकीचे आहे. तसेच हिंदू धर्मियांच्या भावना दुखावण्याचे काम खासदार संजय राऊत यांच्याकडून करण्यात आले आहे, अशी प्रतिक्रिया यावेळी आंदोलकांनी दिली आहे.
संजय राऊतांची पत काय? : निलेश राणे
तर दुसरीकडे खासदार संजय राऊत यांच्या वक्तव्यावरुन शिवसेना शिंदे गटाचे आमदार निलेश राणे यांनी जोरदार टीका केली आहे. यावेळी ते म्हणाले की, संजय राऊत रोज फालतू स्टेटमेंट करत असतात, त्यांची पत काय? असा प्रश्न आमदार निलेश राणे यांनी उपस्थित केला. महाराष्ट्रासाठी त्यांच योगदान काय? त्याला मिडीयाने जिवंत ठेवलं आहे. अशा शब्दात आमदार निलेश राणे यांनी संजय राऊत यांना सुनावलं आहे. उदय सामंत शिंदे गटाचे 20 आमदार घेऊन भाजप मध्ये जातील, या संजय राऊत यांच्या दाव्यावर बोलताना निलेश राणे यांनी संजय राऊत यांच्यावर जोरदार प्रहार केला आहे.
