– अरुण भोई
मिरजगाव (अहमदनगर) : माणुसकीला काळीमा फासणाऱ्या घटना समाजामध्ये सातत्याने घडत असताना अजूनही माणुसकी जिवंत आहे याची प्रचिती नुकतीच आली. राजकीय आणि सामाजिक जीवनात काम करत असताना नेहमीच सर्वसामान्य जनतेशी नाळ जोडलेली असलेले आमदार राम शिंदे यांच्या माणुसकीचे दर्शन रविवारी (दि.16) पुन्हा एकदा घडले.
आमदार राम शिंदे दौऱ्यानिमित्त कर्जत कडे जात असताना त्यांना नुकतीच अपघात झालेली एक दुचाकी दिसली. आपल्या चालकास तात्काळ गाडी थांबविण्याचे आदेश शिंदे यांनी दिले. स्वतः गाडीतून खाली येऊन अपघातात जखमी महिलेला उपस्थित नागरिकांच्या सहकार्यातून स्वतःच्या गाडीत नेऊन कर्जत येथे उपचार केले. विशेष बाब म्हणजे उपचाराचा खर्च देखील त्यांच्याच माध्यमातून करण्यात आला.
सदर महिला श्रीगोंदा तालुक्यातील असून तिच्यावर पूर्णपणे उपचार करून त्या महिलेस सोडण्यात आले. विशेष म्हणजे अपघात ग्रस्त जखमींना पाहून अनेक गाड्या पुढे जात असताना आमदार राम शिंदे यांनी व्यस्त कार्यक्रमात दाखविलेल्या या माणुसकीचे सर्वत्र कौतुक होत आहे.
