Washim Crime: वाशिम : चारचाकी गाडीच्या लालसेपोटी वाशिममध्ये महिलेची हत्या करण्यात आली आहे. मामाकडून पाच लाख रुपयांच्या मागणीचा तगादा करणाऱ्या पतीने पत्नीची धारदार शस्त्राने गळा चिरून हत्या केल्याची घटना वाघजाळी येथे उघडकीस आली आहे. मेघा उर्फ रेवती शिंदे असे मृत महिलेचे नाव आहे.
फिर्यादी मामा गजानन घुले, (रा. चिखली बु) यांनी ग्रामीण पोलीस स्टेशनला दिलेल्या तक्रारीवरून ही घटना उघडकीस आली. रेवती शिंदे हिचा विवाह गजानन शिंदे यामच्यासोबत १ जून २०२३ रोजी संपन्न झाला होता. हत्ये प्रकरणी पती गजानन शिंदे, सासरे बबन शिंदे, सासू पार्वती शिंदे यांच्या विरोधात गुन्हा दाखल करण्यात आला आहे. चारचाकी गाडी घेण्यासाठी मामाकडून ५ लाख आणण्याच्या कारणावरून तिच्यावर सतत शारीरिक व मानसिक छळ करण्यात येत होता.
रेवतीला होत असलेल्या त्रासाला कंटाळून मामाने मागील दिवाळीपूर्वी चेकद्वारे २ लाख आणि नगदी ५० हजार रु. दिले होते. तरी सुद्धा आरोपींनी रेवती हिला त्रास देणे सुरूच ठेवले. सकाळी चार वाजताच्या दरम्यान आरोपी गजानन शिंदे (वय २१) वर्ष याने त्याच्या वाघजाळी येथील राहत्या घरात धारदार शस्त्राने रेवतीच्या गळ्यावर वार करुन तिला ठार केले.
