अमरावती : अमरावतीमधून अपघाताची बातमी समोर येत आहे. अमरावती-नागपूर महामार्गावर शिवशाही बसचा भीषण अपघात झाला असून या अपघातात एका प्रवाशाचा मृत्यू झाला आहे. तर 28 प्रवासी जखमी झाले आहेत. गाईला वाचवण्याच्या प्रयत्नात शिवशाही बसचा अपघात झाल्याचे सांगितले जात आहे.
मिळालेल्या माहितीनुसार, अमरावती-नागपूर महामार्गावर आज सकाळच्या सुमारास एका शिवशाही बसचा अपघात झाला. हा अपघात इतका भीषण होता की बस रस्त्याच्या कडेला पलटी झाली. यात 25 ते 30 प्रवाशी प्रवास करत होते.
28 प्रवासी जखमी तर एकाचा मृत्यू,..
मिळालेल्या माहितीनुसार, ही बस नागपूरहून अकोल्याच्या दिशेने निघाली होती. यावेळी अमरावती-नागपूर महामार्गावर क्रमांक 6 वर एक गाय या बसच्या मध्ये आली. यावेळी बस चालकाने गाईला वाचवण्याचा प्रयत्न केला. मात्र त्याचे बसवरील नियंत्रण सुटले आणि बस रस्त्याच्या कडेला पलटी झाली. या अपघातात 28 प्रवासी जखमी झाले आहेत. तर एका प्रवाशाचा मृत्यू झाला असल्याची माहिती मिळत आहे. या अपघातामुळे अमरावती-नागपूर महामार्गावर मोठी वाहतूक कोंडी झाली आहे. अपघातात जखमी झालेल्या प्रवाशांना रुग्णालयात दाखल करण्यात आले आहे.
