अहमदनगर : अहमदनगरमधून एक धक्कादायक घटना धक्कदायक समोर आली आहे. मांजरीला वाचवण्याच्या प्रयत्नात सहा जण बायोगॅसच्या खड्ड्यामध्ये बुडाल्याची घटना घडली आहे. नेवासा तालुक्यातील वाकडीमध्ये ही थरारक घटना घडली आहे. बायोगॅसच्या खड्ड्यामध्ये बुडालेल्या सहा जणांना बाहेर काढण्याचे शर्तीचे प्रयत्न सुरू आहेत. या घटनेने परिसरात मोठी खळबळ उडाली आहे.
बायोगॅसच्या खड्ड्यात बुडालेल्या व्यक्तींची नावं देखील समोर आली आहेत. माणिक गोविंद काळे, संदीप माणिक काळे, बबलू अनिल काळे, अनिल बापूराव काळे, बाबासाहेब गायकवाड यांच्यासह आणखी दोघांची नावे समोर आली नाहीत.
मिळालेल्या अधिक माहितीनुसार, अहमदनगर जिल्ह्यातील नेवासा तालुक्यातील वाकडी गावामध्ये ही धक्कादायक घटना घडली आहे. बायोगॅसच्या खड्ड्यात पडलेल्या मांजराला वाचवण्यासाठी एक जण खड्ड्यामध्ये उतरला. पण मांजराला वाचवण्याच्या प्रयत्नात तो खड्ड्यात बुडाला. त्याला वाचवण्यासाठी गेलेले इतर ५ जण देखील या खड्ड्यामध्ये बुडाले.
बायोगॅसचा खड्डा शेणाने भरलेला होता. त्यामुळे एकमेकांना वाचवण्याच्या प्रयत्नात सर्वजण खड्ड्यामध्ये बुडाले. या घटनेची माहिती मिळताच पोलिस आणि तहसीलदारांनी घटनास्थळी धाव घेत ग्रामस्थांच्या मदतीने सहाही जणांना बायोगॅसच्या खड्ड्यातून बाहेर काढण्याचे काम सुरू आहे.
