धुळे : धुळ्यातील लोणखेडी येथे हृदय पिळवटून टाकणारी घटना घडली आहे. झोपडीला लागलेल्या आगीत दोन भावंडांचा जागीच होरपळून मृत्यू झाला आहे. मुळचे नाशिकच्या सटाणा तालुक्यातील दिंगरी येथील ही दोन्ही मुले आजोळी आपल्या आजीकडे रहायला आली होती. शनिवारी सगळी ही धक्कादायक घटना घडली. रेणू पवार (४ वर्ष), अमोल पवार (७ वर्ष) अशी मृत बालकांची नावे आहे.
रेणू आणि अमोलचे आई-वडील ऊस तोडीसाठी बारामतीला गेले होते. तेव्हा ही आगीची घटना घडली. या प्रकरणी धुळे तालुका पोलीस ठाण्यात नोंद करण्याचे काम उशिरा पर्यंत सुरू होते. गावबाहेर एका टेकडीवर आजीसोबत झोपडीत ही मुले राहत होती. बालकांची आजी गुरांना पाणी देण्यासाठी गेल्या होत्या. त्याचवेळी झोपडीला आग लागली.
घर टेकडीवर असल्यामुळे वाऱ्यामुळे आगीने जोर धरला होता. पालापाचोळ्यामुळे छताने पेट घेतला. नंतर हळूहळू झोपडीतील साहित्य आगीच्या विळख्यात आले. या घटनेत रेणू व अमोल झोपडीतच अडकले. आजीने हा सगळा प्रकार पाहताच तिने आरडा ओरडा सुरु केला बाहेरुन बचावासाठी उशिराने प्रयत्न सुरू झाले. दुर्दैवाने या घटनेत दोन्ही मुलांचा जागीच होरपळून मृत्यू झाला. आगीचे कारण अद्याप समोर आले नाही. मात्र, चुलीतील विस्तवमुळे ही आग लागल्याचा अंदाज व्यक्त केला जात आहे.
