नंदुरबार : जिल्ह्यातील नवपूर तालुक्यातील कोंडाईबारी घाटात साखरेने भरलेला ट्रक पलटी झाल्याची घटना घडली आहे. साखरेच्या गोण्यानी भरलेला ट्रक अनियंत्रित होऊन डिव्हायडरला आदळल्याने पलटी झाला आहे. घाटात तीव्र उतार असल्याने ट्रक रस्त्यावर काही अंतरापर्यंत फरफटक गेला. या अपघातात चालकाचा जागीच मृत्यू झाला आहे. ट्रकमधील साखरेचा गोण्या देखील महामार्गावर अस्ताव्यस्त पडल्या आहेत. ही घटना रविवारी १८ फेब्रुवारीला सकाळी अकरा वाजण्याच्या सुमारास घडली.
मिळालेल्या अधिक माहितीनुसार, रविवारी सकाळी अकरा वाजण्याच्या सुमारास धुळ्याकडून सुरतच्या दिशेने जाणारा ट्रक अनियंत्रित झाल्याने अपघात झाला आहे. अपघाताची माहिती मिळताच घटनास्थळी विसरवाडी पोलीस महामार्ग मदत केंद्राचे पोलीस कर्मचारी दाखल झाले आणि या ठिकाणी मदत कार्य केले.
ट्रक चालक केबिनमध्ये अडकल्याने त्याला बाहेर काढण्यासाठी पोलिसांनी शर्तीचे प्रयत्न केले. मात्र, त्याचा जागीच मृत्यू झाला. महामार्गावरील वाहतूक सुरळीत करण्यासाठी पोलीस उपाययोजना करत आहे.
