Cyber Crime : मुंबई : देशात एलपीजी गॅसच्या उपलब्धतेबाबत चिंता वाढत असताना फसवणुकीच्या घटना देखील वाढत असल्याचे समोर आले आहे. काही भागांमध्ये गॅस सिलेंडर मिळण्यासाठी नागरिकांना अडचणी येत असून याच परिस्थितीचा गैरफायदा घेत ऑनलाइन स्कॅम करणारे सक्रिय झाले आहेत. गॅस बुकिंगच्या नावाखाली लोकांची आर्थिक फसवणूक करण्याचे प्रकार वाढत असल्याने केंद्र सरकारच्या सायबर सुरक्षा यंत्रणेने नागरिकांना सतर्क राहण्याचा इशारा दिला आहे.
मिळालेल्या माहितीनुसार, सध्या इंटरनेटवर गॅस सिलेंडर बुकिंगसाठी अनेक बनावट अॅप्स, वेबसाइट लिंक आणि हेल्पलाइन क्रमांक उपलब्ध आहेत. नागरिक गॅस मिळवण्यासाठी घाईत असताना ते तपास न करता या लिंकवर क्लिक करतात किंवा अॅप डाउनलोड करतात. याच संधीचा फायदा घेत स्कॅमर्स लोकांची फसवणूक करत आहेत.
भारतीय सायबर क्राइम कोऑर्डिनेशन सेंटरने या प्रकाराबाबत अलर्ट जारी केला आहे. स्कॅमर्स लोकांना मेसेज किंवा सोशल मीडियाद्वारे गॅस सिलेंडरचा तुटवडा असल्याची भीती दाखवतात. त्यानंतर ते तातडीने बुकिंग करण्यास सांगतात आणि फेक लिंक पाठवतात. अनेकदा कमी किंमत किंवा सवलतीचे आमिष दाखवून लोकांना पेमेंट करण्यास प्रवृत्त केले जाते.
या प्रक्रियेत काही जणांकडून अनोळखी अॅप डाउनलोड करून घेतले जाते किंवा क्यूआर कोड स्कॅन करण्यास सांगितले जाते. तसेच ओटीपी किंवा वैयक्तिक माहिती मागितली जाते. एकदा ही माहिती दिल्यानंतर फसवणूक करणारे थेट बँक खात्यातून पैसे काढू शकतात.
तज्ञांच्या मते, नागरिकांनी अधिकृत गॅस कंपनीच्या वेबसाइट किंवा अॅपद्वारेच बुकिंग करावे. कोणतीही संशयास्पद लिंक, मेसेज किंवा फोन कॉलवर विश्वास ठेवू नये. ओटीपी किंवा बँक संबंधित माहिती कोणालाही देऊ नये, असे आवाहन करण्यात आले आहे.
