लोणी काळभोर: कदमवाकवस्ती (ता. हवेली) येथील इंदिरानगरमध्ये घरासमोर खोदलेल्या आणि पावसाच्या पाण्याने भरलेल्या चरीत पडून दोन वर्षीय सोहम कसबे या चिमुकल्याचा दुर्दैवी मृत्यू झाल्याप्रकरणी अखेर संबंधित ठेकेदाराविरोधात लोणी काळभोर पोलीस ठाण्यात गुन्हा दाखल करण्यात आला आहे. या घटनेनंतर परिसरात तीव्र संताप व्यक्त होत असून, निष्काळजीपणामुळे एका निष्पाप बालकाचा जीव गेल्याची भावना नागरिकांकडून व्यक्त केली जात आहे.
याप्रकरणी सोहमची आई शिल्पा लखन कसबे (वय २३) यांनी दिलेल्या फिर्यादीवरून गुन्हा दाखल करण्यात आला आहे. पोलिसांनी दिलेल्या माहितीनुसार, अंबाबाई मंदिराजवळील इंदिरानगर परिसरात सुमारे आठ दिवसांपूर्वी सांडपाणी व पावसाच्या पाण्याचा निचरा करण्यासाठी जेसीबीच्या सहाय्याने मोठा चर खोदण्यात आला होता. मात्र, खोदकाम पूर्ण झाल्यानंतर त्या ठिकाणी कोणतीही सुरक्षा व्यवस्था, संरक्षक कठडे, इशारा फलक किंवा पाण्याचा निचरा करण्याची उपाययोजना करण्यात आली नाही. परिणामी तीन ते चार फूट खोल आणि सुमारे पाच फूट रुंद खड्ड्यात पावसाचे व सांडपाणी साचून तो जीवघेणा ठरला.
सोहम घरासमोर खेळत असताना ३० जून रोजी सकाळी अचानक बेपत्ता झाला. आईने परिसरात शोध घेतला असता चरीजवळ त्याची चप्पल दिसली. त्यानंतर नातेवाईकांनी पाण्यात शोध घेतला असता सोहम बेशुद्ध अवस्थेत आढळून आला. त्याला तातडीने विश्वराज रुग्णालयात नेण्यात आले. मात्र, डॉक्टरांनी तपासणीअंती उपचारापूर्वीच त्याला मृत घोषित केले.
दरम्यान, संबंधित ठेकेदाराने कोणतीही सुरक्षा उपाययोजना न करता खोदलेला चर तसेच त्यात साचलेले पाणी यामुळेच आपल्या मुलाचा मृत्यू झाल्याचा गंभीर आरोप करण्यात आला आहे. या निष्काळजीपणामुळेच दोन वर्षांच्या चिमुकल्याचा बळी गेल्याचे फिर्यादीत नमूद करण्यात आले आहे. या हृदयद्रावक घटनेनंतर संबंधित ठेकेदाराविरोधात कायदेशीर कारवाईची मागणी नागरिकांकडून होत होती. अखेर लोणी काळभोर पोलिसांनी फिर्याद दाखल करून पुढील तपास सुरू केला आहे.
