पुणे: पुण्यात ड्रंक अँड ड्राईव्हच्या घटनांवर अद्यापही लगाम लागलेला नसल्याचे आणखी एका प्रकारातून स्पष्ट झाले आहे. कल्याणीनगर येथील पॉर्शे अपघातानंतर शहरात कडक कारवाईची अपेक्षा व्यक्त होत असतानाच, चांदणी चौकात घडलेल्या नव्या घटनेने नागरिकांमध्ये संताप वाढवला आहे.
18 मार्च रोजी सकाळी साडेसातच्या सुमारास, अत्यंत वर्दळीच्या चांदणी चौक परिसरात एका मद्यधुंद बीएमडब्ल्यू चालकाने समोरच्या कारला जोरदार धडक दिली. विशेष म्हणजे, अपघातानंतर परिस्थिती हाताळण्याऐवजी हा चालक गाडीतच बसून राहिला आणि काही वेळातच झोपून गेला. जवळपास 10 ते 15 मिनिटे तो भर ट्रॅफिकमध्ये गाडीतच बेशुद्ध अवस्थेत पडून असल्याने वाहतुकीची मोठी कोंडी निर्माण झाली.
घटनेदरम्यान नागरिकांनी आरडाओरडा करून चालकाला उठवण्याचा प्रयत्न केला, मात्र तो पूर्णपणे नशेत असल्याने प्रतिसाद देत नव्हता. सुदैवाने या अपघातात कुणालाही दुखापत झाली नाही, मात्र गर्दीच्या ठिकाणी अशा प्रकारे वाहन चालवणे किती धोकादायक ठरू शकते, याची पुन्हा एकदा जाणीव झाली.
या घटनेचे व्हिडिओ सोशल मीडियावर मोठ्या प्रमाणात व्हायरल झाले असून, नागरिकांकडून संबंधित चालकावर कठोर कारवाईची मागणी होत आहे. शहरात वाढत्या अशा घटनांमुळे वाहतूक नियमांची अंमलबजावणी किती प्रभावी आहे, यावरही प्रश्नचिन्ह उपस्थित होत आहे.
पुण्यासारख्या शहरात सकाळच्या वेळेसही मद्यधुंद अवस्थेत वाहन चालवले जात असल्याचे हे उदाहरण गंभीर असून, यावर कठोर आणि सातत्यपूर्ण कारवाई होणे आवश्यक असल्याची भावना व्यक्त केली जात आहे.
