पुणे : अमेरिका -इराण संघर्ष निवळल्याने आंतरराष्ट्रीय बाजारात खनिज तेलाचे दर कमी आले आहेत. या कच्च्या तेलाच्या किमती कमी होऊनही देशात पेट्रोल-डिझेलचे दर का घटले नाहीत? असा प्रश्न सामान्यांकडून विचारला जात आहे. यावर केंद्रीय पेट्रोलियम मंत्री हरदीपसिंह पुरी यांनी महत्त्वाची माहिती देत इधंनाचे दर कमी होण्याचे संकेत दिले आहेत.
केंद्रीय पेट्रोलियम मंत्री पुरी यांनी असे म्हटले आहे कि,जागतिक घडामोडींवर सरकारचे बारीक लक्ष असून, पुढील 10 ते 15 दिवसांत इंधन दरांचा आढावा घेतला जाईल. जर कच्च्या तेलाचे दर असेच कमी राहिले, तर येत्या काळात सर्वसामान्यांना दिलासा मिळू शकतो, असे संकेत त्यांनी दिले आहेत.
केंद्रीय मंत्र्यांनी स्पष्ट केले की, जागतिक बाजारात कच्च्या तेलाची किंमत घसरली तरी त्याचा थेट आणि तात्काळ परिणाम किरकोळ दरांवर होत नाही. याचे मुख्य कारण म्हणजे कच्चे तेल खरेदी करणे, त्याची वाहतूक, शुद्धीकरण आणि वितरण या संपूर्ण प्रक्रियेला काही आठवड्यांचा काळ लागतो.
सध्या आपण जे पेट्रोल-डिझेल वापरत आहोत, ते साधारण 2 महिन्यांपूर्वी खरेदी केलेल्या कच्च्या तेलापासून बनवलेले आहे.
देशातील मोठी खासगी इंधन विक्रेता कंपनी ‘नायरा एनर्जी’ने आपल्या दरात कपात केली आहे. त्यांनी पेट्रोल 5 रुपये प्रति लिटर आणि डिझेल 3 रुपये प्रति लिटर स्वस्त केले आहे. यामुळे आता सरकारी तेल कंपन्यांवरही दर कमी करण्यासाठी दबाव वाढला असून, ग्राहक मोठ्या निर्णयाची वाट पाहत आहेत.
दरम्यान सरकारी तेल कंपन्यांनी 3 जुलै 2026 रोजीही दरांमध्ये कोणताही बदल केलेला नाही. यंदा मे महिन्यात विधानसभा निवडणुकांचे निकाल लागताच, अवघ्या 11 दिवसांत इंधनाचे दर 4 वेळा वाढवण्यात आले होते.
उत्पादक देशांनी कच्च्या तेलाचा पुरवठा वाढवण्याचे संकेत दिल्यामुळे जागतिक बाजारात घसरण सुरू आहे. त्यामुळे लवकरच देशांतर्गत बाजारातही पेट्रोल-डिझेल स्वस्त होण्याची चिन्हे आहेत.त्यामुळे लवकरच सर्वसामान्याना मोठा दिलासा मिळणार आहे.
